ប្រសិនបើអ្នកត្រូវការបិទគេហទំព័រនេះភ្លាមៗ ដើម្បីសុវត្ថិភាពផ្ទាល់ខ្លួន សូមអ្នកចុចលើប៊ូតុងពណ៌ក្រហមនៅខាងក្រោមបង្អស់នៃគេហទំព័រនេះ ។ ប៊ូតុងនេះនឹងនាំអ្នកទៅកាន់គេហទំព័រមួយផ្សេងទៀត ។
ខិត្តប័ណ្ណ អំពើហិង្សាក្នុងគ្រួសារ និងផ្លូវភេទ 
អាន និងស្តាប់ព័ត៌មានក្នុងខិត្តប័ណ្ណនេះ ដើម្បីស្វែងយល់បន្ថែមអំពីអំពើហិង្សាក្នុងគ្រួសារ និងសិទ្ធិរបស់អ្នក ។ ខិត្តប័ណ្ណនេះអាចជួយ ឱ្យអ្នកយល់ដឹងពីបទល្មើសនិងទោសទណ្ឌដែលពាក់ព័ន្ធ ជម្រើសនៃការដាក់ពាក្យបណ្តឹងតាមនីតិវិធីច្បាប់ និងការទទួលខុសត្រូវរបស់អាជ្ញាធរមានសមត្ថកិច្ច ។
ខិត្តប័ណ្ណ ចែករំលែកព័ត៌មានអំពីអំពើរំលោភសេពសន្ថវៈ និងអំពើហិង្សាផ្លូវភេទ ។ លោកអ្នកអាចអាន និងស្តាប់ព័ត៌មានលើខិត្តប័ណ្ណអំពី ប្រភេទនៃហិង្សានីមួយៗ សិទ្ធិនិងបទល្មើសព្រហ្មទណ្ឌ និង កម្រិតទោសពន្ធនាគារដែលពាក់ព័ន្ធ និងការស្វែងរកយុត្តិធម៌ ។
គន្លឹះសុវត្ថិភាព សម្រាប់អ្នកស្ថិតក្នុងស្ថានភាពប្រឈម នៃអំពើហិង្សាក្នុងគ្រួសារ និងអំពើហិង្សាផ្លូវភេទ
អំពើហិង្សាក្នុងគ្រួសារ និងអំពើហិង្សាផ្លូវភេទ គឺជាបទល្មើសព្រហ្មទណ្ឌ ហើយអ្នកមិនគួររស់នៅជាមួយអំពើហិង្សានោះឡើយ ។ ទោះបីជាយ៉ាងណា មានស្ថានភាពមួយចំនួនដែលអ្នក និងកូនរបស់អ្នកអាចកំពុងស្ថិតក្នុងស្ថានភាពគ្រោះថ្នាក់ ។ សំណួរខាងក្រោម អាចជួយអ្នកឱ្យគិតអំពីសុវត្ថិភាពរបស់អ្នក និង ផ្តល់ជាគំនិតដើម្បីជួយអ្នកធ្វើផែនការ ។
អ្នកគួរទទួលបានការគាំទ្រពីអាជ្ញាធរ អង្គការ ក្រុមគ្រួសារ និងសហគមន៍របស់អ្នក ។ អ្នកក៏អាច ទាក់ទងមកស្ថាប័នដែលមានរាយនាមក្នុងបញ្ជីខាងក្រោម សម្រាប់ព័ត៌មានបន្ថែមអំពីផ្លូវច្បាប់ សុវត្ថិភាព និងជម្រើសផ្សេងទៀតរបស់អ្នក ។
សេចក្តីណែនាំ
អ្នកអាចនឹងនៅតែស្ថិតក្នុងហានិភ័យនៃអំពើហិង្សា ក្នុងស្ថានភាពដូចជា៖
- ប្រសិនបើអ្នកកំពុងរស់នៅជាមួយនរណាម្នាក់ដែលប្រើហិង្សា ឬអាចនឹងប្រើហិង្សា
- ប្រសិនបើអ្នកកំពុងរៀបចំចាកចេញ ឬលែងលះដៃគូអ្នក ដែលអាចមានប្រតិកម្មហិង្សា
- ប្រសិនបើអ្នកបានលែងលះគ្នា ឬចែកផ្លូវគ្នា ហើយអ្នកព្រួយបារម្ភខ្លាចពួកគេត្រឡប់មកវិញ
- ប្រសិនបើជនល្មើស កំពុងបន្តរស់នៅក្បែរកន្លែងដែលអ្នករស់នៅ ។ល។
ទោះបីជាអ្នកមិនមែនជាអ្នកទទួលខុសត្រូវក្នុងការបញ្ឈប់អំពើហិង្សា វាអាចមានប្រយោជន៍ក្នុងការរៀបចំផែនការជាក់លាក់ខ្លះៗ ដើម្បីបង្កើនសុវត្ថិភាពរបស់អ្នក នៅមុនពេល និងអំឡុងពេលមានបញ្ហាប្រឈមកើតឡើង ។
សំណួរខាងក្រោមអាចជួយអ្នករៀបចំផែនការ មុនពេលអំពើហិង្សាកើតឡើង ។ អ្នកប្រហែលជាបានអនុវត្តជំហានទាំងនេះរួចមកហើយ គំនិតខ្លះវាអាចនឹងមិនសមស្របចំពោះស្ថានភាពរបស់អ្នក ឬអ្នកមិនអាចធ្វើវាបាន ។ ប៉ុន្តែមិនថ្វីទេ អ្នកអាចផ្ដោតសំខាន់ទៅលើលទ្ធភាព និងចំណុចខ្លាំងដែលអ្នកអាចធ្វើទៅបាន ។
សូមកុំជ្រើសយកជំហានណាដែលអាចនាំអ្នកឱ្យស្ថិតក្នុងស្ថានភាពគ្រោះថ្នាក់ ប្រសិនបើជនល្មើសបានដឹងពីជំហានទាំងនេះ ។ សូមជឿជាក់លើការវិនិច្ឆ័យរបស់អ្នក ព្រោះមានតែអ្នកទេ ដែលដឹងច្បាស់ថាគួរធ្វើយ៉ាងណាដើម្បីឱ្យអ្នក និងកូនរបស់អ្នកមានសុវត្ថិភាព ។
រៀបចំផែនការ ដើម្បីបង្កើនសុវត្ថិភាពរបស់អ្នក សូមពិចារណាសំណួរខាងក្រោម៖
តើនរណាដែលអាចជួយខ្ញុំបាន នៅមុនពេល ឬអំឡុងពេលគ្រាមានអាសន្ន? តើពួកគេអាចជួយខ្ញុំយ៉ាងដូចម្តេច?
សូមគិតថា តើ សមាជិកគ្រួសារ មិត្តភក្តិ អ្នកជិតខាង ចាស់ទុំ ព្រះសង្ឃ ថៅកែ មិត្តរួមការងារ អាជ្ញាធរមូលដ្ឋាន នគរបាល ឬ អង្គការមិនមែនរដ្ឋាភិបាល ណាមួយដែលអាចជួយអ្នកបាន ។ វាអាចនឹងពិបាកសម្រាប់អ្នកក្នុងការទាក់ទងសុំជំនួយ ប៉ុន្តែមនុស្សដែលអ្នកជឿទុកចិត្ត អាចដើរតួនាទីយ៉ាងសំខាន់ក្នុងការជួយអ្នក និងកូនរបស់អ្នកឱ្យមានសុវត្ថិភាព ។
មនុស្សផ្សេងៗគ្នា អាចផ្តល់ការ គាំទ្រក្នុងទម្រង់ខុសៗគ្នា ដូចជា ការគាំទ្រផ្នែកអារម្មណ៍ អន្តរាគមន៍ក្នុងគ្រាមានអាសន្ន ការថែទាំកុមារ ការផ្តល់លំនៅដ្ឋាន មធ្យោបាយធ្វើដំណើរ ការគាំទ្រផ្នែកហិរញ្ញវត្ថុ ផ្តល់ព័ត៌មានផ្លូវច្បាប់ឬ ផ្តល់នូវសម្ភារៈចំាបាច់ដូចជាសម្លៀកបំពាក់ ។
សូមពិចារណាសុំ អ្នកជិតខាងឱ្យជួយហៅរកជំនួយ ប្រសិនបើពួកគេឮ ឬ ឃើញអំពើហិង្សា ។
វាអាចមានប្រយោជន៍ផងដែរក្នុងការ បង្កើត "ពាក្យគន្លឹះ" ឬ សញ្ញាផ្សេងៗជាមួយអ្នកដែលអាចជួយអ្នកក្នុងគ្រាមានអាសន្ន ។ ពាក្យគន្លឹះ អាចជាពាក្យទូទៅ ឬ ប្រយោគដែលមិនជាក់លាក់ណាមួយដែលអ្នកជ្រើសរើស និងពិភាក្សាជាមួយមនុស្សដែលអ្នកជឿទុកចិត្ត មុនពេលអ្នកស្ថិតក្នុងស្ថានភាពគ្រោះថ្នាក់។ បន្ទាប់មកអ្នកអាចនិយាយពាក្យគន្លឹះដែលអ្នកបានព្រមព្រៀងគ្នាក្នុងការហៅ ឬ ផ្ញើសារដើម្បីសុំជំនួយបន្ទាន់ពីបុគ្គលដែលអ្នកជឿទុកចិត្ត ដោយមិនឱ្យជនល្មើសដឹង ។
តើខ្ញុំអាចទៅកន្លែងណា ដើម្បីមានសុវត្ថិភាព? តើកូនខ្ញុំអាចទៅកន្លែងណាបាន?
សូមពិចារណាទៅកន្លែងផ្សេងភ្លាម ប្រសិនបើការគំរាមកំហែងកំពុងកើតឡើង ឬ អ្នកមានអារម្មណ៍ថាមិនមានសុវត្ថិភាព ។ សូមគិតទុកជាមុន នូវទីកន្លែងណាមួយដែលអ្នក និងកូនរបស់អ្នកអាចទៅបាន ។ ជម្រើសរបស់អ្នកអាចជា ផ្ទះរបស់មនុស្សដែលអ្នកជឿទុកចិត្ត កន្លែងអាជ្ញាធរមូលដ្ឋាន ក្នុងវត្ត ឬទីតាំងសាធារណៈនានា ដូចជាទីផ្សារ ផ្លូវដែលមានមនុស្សច្រើន សាលាឆទាន ភោជនីយដ្ឋាន ឬហាងលក់ទំនិញ ។
សូមគិតពី មធ្យោបាយធ្វើដំណើរ និង វិធីដែលអ្នកអាចទៅដល់ទីតាំងនោះ ក្នុងគ្រាមានអាសន្ន ។ សូមគិតពីទីកន្លែងដែលអ្នកអាចស្នាក់នៅបានក្នុងរយៈពេលខ្លី ឬ រយៈពេលវែង។
តើមានលេខទូរស័ព្ទណាមួយ ដែលខ្ញុំត្រូវការក្នុងគ្រាមានអាសន្ន?
ប្រសិនបើអ្នកអាចប្រើទូរស័ព្ទបាន សូមពិចារណារក្សាលេខទំនាក់ទំនងក្នុង បញ្ជីលេខទូរស័ព្ទ រួមមានលេខទូរស័ព្ទនគរបាល អាជ្ញាធរមូលដ្ឋាន និងលេខមនុស្សដែលអ្នកជឿទុកចិត្ត ។ ជាជម្រើស សូមចងចាំ ទុកយ៉ាងហោចណាស់លេខទូរស័ព្ទសំខាន់ ១ខ្សែ។
តើបរិវេណផ្ទះរបស់ខ្ញុំ កន្លែងណាដែលមានសុវត្ថិភាពបំផុត?
ប្រសិនបើការគំរាមកំហែងកំពុងកើតឡើង ឬ អ្នកមានអារម្មណ៍ថាមិនមានសុវត្ថិភាព សូមពិចារណា ផ្លាស់ទីទៅបរិវេណណាដែលមានសុវត្ថិភាពបំផុត នៃផ្ទះរបស់អ្នក ។
បរិវេណខ្លះនៃផ្ទះអាចមានសុវត្ថិភាពជាង ព្រោះ ងាយស្រួលគេចចេញ តាមរយៈបង្អួច ឬទ្វារ។ បរិវេណផ្សេង ទៀតនៃផ្ទះអាចមិនសូវមានសុវត្ថិភាព ព្រោះតែវាអាចមាន កម្ពស់ដ៍គ្រោះថ្នាក់ (ដូចជាកាំជណ្ដើរ វេរ៉ង់ដា និងដំបូលផ្ទះ) ឬ មានវត្ថុគ្រោះថ្នាក់ផ្សេងៗ ដែលជនល្មើសប្រើប្រាស់ជាអាវុធ (ដូចជាកាំបិតធ្វើម្ហូប ឬឧបករណ៍សម្រាប់ធ្វើស្រែចំការផ្សេងៗ) ។
សូមពិចារណាទុកដាក់សម្ភារៈដែលអាចប្រើជាអាវុធនៅទីកំបាំង ឬ ទីកន្លែងដែលពិបាកនឹងយកបាន ។
តើខ្ញុំអាចជួយកូនរបស់ខ្ញុំឱ្យត្រៀមខ្លួន និងរក្សាសុវត្ថិភាពកូន ដោយរបៀបណា ?
សូមផ្តល់ ការធានា និងក្តីស្រលាញ់ ដល់កូនអ្នកជានិច្ច ។ បញ្ជាក់ប្រាប់កូនអ្នកថា អំពើហិង្សាណាមួយមិនមែនជាកំហុសរបស់ពួកគេទេ ។ ប្រាប់ពួកគេថា សូមកុំព្យាយាមធ្វើអន្តរាគមន៍ ឬការពារអ្នក ។
អាស្រ័យលើវ័យរបស់កូនអ្នក អ្នកអាចពិចារណាបង្រៀនពួកគេជាមុនអំពីអ្វីដែលត្រូវធ្វើ ប្រសិនបើមានការគំរាមកំហែងកើតឡើងកាន់តែខ្លាំង ឬ ពួកគេឃើញ ឬ ឮនូវអំពើហិង្សា ។ សូម បង្រៀនពួកគេពីសកម្មភាពមួយជំហានម្តងៗ ដែលពួកគេអាចធ្វើ ដូចជាត្រូវរត់ចេញទៅ ឬលាក់ខ្លួននៅកន្លែងដែលមានសុវត្ថិភាព និងជូនដំណឹងដល់អ្នកដទៃថាអ្នកត្រូវការជំនួយ ។
ពិភាក្សាជាមួយកូនអ្នកជាមុន ថាតើកន្លែងណាដែលមានសុវត្ថិភាពបំផុតសម្រាប់អ្នកនិងកូនអ្នក របៀបដែលពួកគេអាចទៅដល់ទីនោះ នរណាដែលពួកគេអាចសុំជំនួយ និង របៀបស្វែងរកលេខទូរស័ព្ទសំខាន់ៗណាមួយ ។
ប្រសិនបើខ្ញុំត្រៀមចាកចេញពីផ្ទះ តើខ្ញុំគួរយករបស់ចំាបាច់អ្វីខ្លះទៅជាមួយ?
វាអាចមានគ្រោះថ្នាក់ នៅពេលដែលអ្នកចង់ត្រឡប់មកផ្ទះវិញបន្ទាប់ពីចាកចេញ ជាពិសេសនៅពេលដែល អ្នកមានគម្រោងលែងលះ ឬចែកផ្លូវគ្នា ។ សូមពិចារណា ថាតើអ្នកអាចយករបស់របរប្រើប្រាស់ដោយសុវត្ថិភាពដូចជា៖
- កូនសោ
- លុយ ឬរបស់មានតម្លៃ
- ទូរស័ព្ទ
- សម្លៀកបំពាក់ចាំបាច់
- សម្ភារៈប្រើប្រាស់របស់កូន
- ឯកសារសំខាន់ៗ (ដូចជា អត្តសញ្ញាណប័ណ្ណ ឬ សំបុត្រកំណើត)
- ថ្នាំពេទ្យ
សូមពិចារណា ក្នុងការរក្សាទុកនូវសម្ភារៈដែលចាំបាច់ទាំងឡាយក្នុង កាបូបតូចមួយ ក្នុងករណីដែលអ្នកត្រូវចាកចេញភ្លាមៗ ។ ជាជម្រើស សូមទុកដាក់សម្ភារៈចាំបាច់ទាំងនោះនៅកន្លែងដែលមានសុវត្ថិភាព មុនពេលចាកចេញ ដូចជា រក្សាទុកនៅផ្ទះមនុស្សដែលអ្នកជឿទុកចិត្ត ឬ នៅកន្លែងធ្វើការរបស់អ្នក ។
តើខ្ញុំអាចពង្រឹងឯករាជ្យភាពផ្នែកហិរញ្ញវត្ថុរបស់ខ្ញុំ ពីជនប្រព្រឹត្តបានទេ?
សូមពិចារណា ប្រសិនបើអ្នកអាចពង្រឹងឯករាជ្យភាពផ្នែកហិរញ្ញវត្ថុរបស់អ្នកតាមរយៈ៖
- ការសន្សំប្រាក់
- លាក់ទុកវត្ថុមានតម្លៃ ដូចជាលុយកាក់ និងមាស
- រក្សាទុកលុយ និងវត្ថុមានតម្លៃ ជាមួយមនុស្សដែលអ្នកជឿទុកចិត្ត
- បើកគណនីធនាគារផ្ទាល់ខ្លួន
- ចូលរួមក្រុមសន្សំ
- បង្កើនប្រាក់ចំណូលផ្ទាល់ខ្លួនរបស់អ្នក
តើអាចនឹងមានករណីដែលជនល្មើសមកធ្វើបាបខ្ញុំ ឬ កូនខ្ញុំនៅកន្លែងធ្វើការ សាកលវិទ្យាល័យ ឬសាលារៀនទេ?
សូមពិចារណាក្នុងការ ប្រាប់មនុស្សដែលអ្នកជឿទុកចិត្ត មនុស្សដែលអ្នកគួរប្រាប់ នៅកន្លែងធ្វើការ សាកលវិទ្យាល័យ ឬសាលារៀន អំពីស្ថានភាពគ្រោះថ្នាក់ ដែលអាចកើតឡើងចំពោះសុវត្ថិភាពអ្នក និងកូនរបស់អ្នក ។ អ្នកអាច ពន្យល់ពួកគេអំពីអ្វីដែលពួកគេអាចជួយអ្នកបាន ដូចជាកុំបង្ហាញទីតាំងរបស់អ្នក មិនអនុញ្ញាតឱ្យជនល្មើសចូលទៅកន្លែងដែលអ្នកកំពុងស្ថិតនៅ និង មិនអនុញ្ញាតឱ្យកូនរបស់អ្នកទៅជាមួយជនល្មើសជាដើម។
ប្រសិនបើជនល្មើសមកកន្លែងធ្វើការរបស់អ្នក ឬ សាលារៀន អ្នកគួរពិចារណាបន្តនៅកន្លែងធ្វើការរហូតដល់អ្នកប្រាកដថាជននោះបានចាកចេញពីទីនោះ ។ ជាជម្រើស អ្នកអាចគិតជាមុន នូវវិធីដែលសុវត្ថិភាពបំផុត ក្នុងការចាកចេញ ។
តើអាចនឹងមានករណីដែលជនល្មើសមកធ្វើបាបខ្ញុំ ឬ កូនខ្ញុំ ពេលពួកខ្ញុំកំពុង ធ្វើដំណើរឬទេ?
ប្រសិនបើអាច សូមពិចារណាធ្វើដំណើរតាម មធ្យោបាយធ្វើដំណើរខុសៗគ្នា និង/ឬ តាមផ្លូវផ្សេងគ្នា ជារៀងរាល់ថ្ងៃ ។ ពិចារណា ស្នើសុំនរណាម្នាក់ដើម្បីទៅជាមួយអ្នក ឬកូនរបស់អ្នក ។
តើការប្រើប្រាស់ទូរស័ព្ទ ឬការបង្ហោះព័ត៌មានក្នុងបណ្តាញទំនាក់ទំនងសង្គម អាចមានហានិភ័យសម្រាប់ខ្ញុំដែរ ឬទេ?
សូមប្រុងប្រយ័ត្ន រាល់ការបង្ហោះ ហ្វេសប៊ុក និងបង្ហោះនៅលើបណ្តាញទំនាក់ទំនងសង្គមនានា អាចផ្តល់ព័ត៌មានដល់ជនល្មើស អំពីទីតាំងដែលអ្នកកំពុងស្ថិតនៅ ។
សូមកុំប្រើ ពាក្យសម្ងាត់ ឬ លេខកូដបួនខ្ទង់ ដែលជនល្មើសអាចទាយដឹងយ៉ាងងាយស្រួល ដូចជាថ្ងៃខែឆ្នាំកំណើត ឬ លេខទូរស័ព្ទរបស់អ្នក។ ប្រសិនបើមានសុវត្ថិភាព សូមប្តូរលេខសម្ងាត់ជាប្រចាំលើទូរស័ព្ទ លើគណនីក្នុងបណ្តាញទំនាក់ទំនងសង្គម និង គណនីធនាគាររបស់អ្នក ។ ទោះបីជាយ៉ាងណាក៏ដោយ សូមចងចាំថា ជនល្មើសដែលមានសិទ្ធិចូលប្រើគណនីរបស់អ្នក អាចនឹងដឹងថា អ្នកបានផ្លាស់ប្តូរពាក្យសម្ងាត់ ។
ពិចារណាក្នុងការ បិទ ឬ ប្លុក លេខទូរស័ព្ទ និងគណនីបណ្តាញទំនាក់ទំនងសង្គមរបស់ជនល្មើស ដើម្បីកាត់បន្ថយទំនាក់ទំនងដែលអ្នកមិនចង់បាន ។
សូមបិទគេហទំព័រនេះ បន្ទាប់ពីអ្នកបានប្រើប្រាស់វារួចរាល់ ហើយប្រសិនបើអាច សូមលុបទំព័រនេះចេញពីប្រវត្តិស្វែងរករបស់អ្នក ។
តើខ្ញុំអាចធ្វើឱ្យផ្ទះរបស់ខ្ញុំមានសុវត្ថិភាពជាងមុនបានទេ?
សូមពិចារណា ថាតើអ្នកអាចបំពាក់នូវ អំពូលចាប់ចលនា ឬ កាមេរ៉ាសុវត្ថិភាព ដើម្បីជាសញ្ញាពេលមាននរណាម្នាក់ដើរចូលមកក្បែរផ្ទះអ្នក ។ ប្រសិនបើ អ្នកមិនរស់នៅជាមួយជនល្មើសទេ សូមពិចារណា ថាតើអ្នកអាចដំឡើង ឬ ផ្លាស់ប្ដូរសោរ និងជួសជុលផ្នែកណាមួយនៃផ្ទះដែលមិនសូវរឹងមាំ ដែលអាចងាយស្រួលចូល ។
អ្នកមិនគួររស់នៅក្នុងភាពភ័យខ្លាច នៃអំពើហិង្សាឡើយ ។ ការគាំទ្រ ពិតជាមាន ។ សូមទាក់ទងមក អង្គការមិនមែនរដ្ឋាភិបាលដែលមានរាយនាមក្នុងបញ្ជីខាងក្រោម សម្រាប់ព័ត៌មានបន្ថែមអំពីផ្លូវច្បាប់ សុវត្ថិភាព និង ជម្រើសផ្សេងទៀតសម្រាប់អ្នក ។
ការស្វែងរកយុត្តិធម៌តាមនីតិវិធីច្បាប់
សូមមើលវីដេអូនេះ ដើម្បីស្វែងយល់អំពីនីតិវិធីច្បាប់ ។ វីដេអូដែលពន្យល់អំពីដំណើរការផ្លូវច្បាប់ដោយបង្ហាញនូវព័ត៌មានមួយចំនួនដែលបុគ្គលគ្រប់រូបគួរយល់ដឹង និងរបៀបរៀបចំខ្លួននៅក្នុងដំណាក់កាលនីមួយៗនៃប្រព័ន្ធតុលាការ ដើម្បីស្វែងរកយុត្តិធម៌ ។ វីដេអូនេះក៏ពន្យល់ផងដែរ អំពីសិទ្ធិរបស់អ្នក និងឆ្លើយតបទៅនឹងសំណួរមួយចំនួនអំពីលទ្ធភាពនៃការចាប់ និងការឃាត់ខ្លួនជនសង្ស័យ ។
ទំនាក់ទំនង
ប្រសិនបើអ្នកជួបប្រទះនឹងអំពើហិង្សាក្នុងគ្រួសារ ឬផ្លូវភេទ ស្ថាប័ន ខាងក្រោមនេះ អាចជួយផ្តល់ជាព័ត៌មាន ឬសេវាកម្មផ្សេងៗ ដែលអ្នកត្រូវការ ។ ព័ត៌មាននៅក្នុងបញ្ជីនេះ អាចនឹងត្រូវបានបន្ថែមទៀតនាពេលអនាគត ។
សម្ព័ន្ធខ្មែរជំរឿន និងការពារសិទិ្ធមនុស្ស (លីកាដូ)
ជំនួយផ្នែកច្បាប់ ពេទ្យ និងសេវាសង្គមសម្រាប់ស្រ្តី និងកុមារ
ទូរស័ព្ទលេខ៖ ០១២ ៥៣៦ ៣០០ / ០១៥ ៥៥៣ ៨៥៥
សម្រាប់ព័ត៌មានបន្ថែម៖ https://www.licadho-cambodia.org/contact.php
សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក)
ជំនួយផ្នែកច្បាប់ និងសេវាសង្គមសម្រាប់ស្រ្តី និងកុមារ
ទូរស័ព្ទលេខ៖ ០៨៦ ៧៩២ ៦៦៦ / ០៩៧ ៦១៦ ២៧៩០
សម្រាប់ព័ត៌មានបន្ថែម៖ https://www.adhoccambodia.org/km/contact-us/
អង្គការកម្ពុជាដើម្បីជួយស្ត្រីមានវិបត្តិ (CWCC)
ជំនួយផ្នែកច្បាប់ ជំរកសុវត្ថិភាព ការប្រឹក្សា និងសេវាកម្មផ្សេងទៀត សម្រាប់ស្ត្រី និងក្មេងស្រី
ទូរស័ព្ទលេខ៖ ០១២ ២៤៣ ៩៨៨ / ០២៣ ៩៨៧ ១៥៨ (រាជធានីភ្នំពេញ) /
០៨៧ ៩០៩ ០២០ (ខេត្តបន្ទាយមានជ័យ) ០៦៣ ៩៦៣ ២៧៦ (ខេត្តសៀមរាប) / ០៦២ ២១០ ៥១៥ (ខេត្តកំពង់ធំ)
សម្រាប់ព័ត៌មានបន្ថែម៖ http://cwcc.org.kh/contact/
អង្គការថែទាំសុខភាពគ្រួសារកម្ពុជា (រ៉ាក់)
សេវាសុខភាពផ្លូវភេទ និងសុខភាពបន្តពូជសម្រាប់អ្នករងគ្រោះដោយអំពើហិង្សាផ្លូវភេទ និងផ្អែកលើយែនឌ័រ
ទូរស័ព្ទលេខ៖ ០១០ ៨១២ ៨១២ / ០៨៩ ៣៣៣ ៩៩០ / ០៨៨ ៧១០ ៧១០៧
សម្រាប់ព័ត៌មានបន្ថែម៖ https://www.rhac.org.kh/clinic#rhac-branch
អង្គការសកម្មភាពដើម្បីកុមារ (APLE)
ជំនួយផ្នែកច្បាប់ ប្រឹក្សាយោបល់ និងការអន្តរាគមន៍វិបត្តិ សម្រាប់កុមាររងគ្រោះនៃអំពើរំលោភបំពាន និងកេងប្រវ័ញ្ចផ្លូវភេទ
ទូរស័ព្ទលេខ៖ ០៩២ ៣១១ ៥១១ / ០២៣ ៩៩៦ ៣៥១ / ០១២ ៥៨៤ ១៩៤
សម្រាប់ព័ត៌មានបន្ថែម៖ https://aplecambodia.org/en/contact-us-3/
ច្បាប់ដែលពាក់ព័ន្ធ
ច្បាប់ទាំងនេះបានចែងនូវសិទ្ធិ និងបទល្មើសព្រហ្មទណ្ឌមួយចំនួន ហើយនិងមាត្រាមួយចំនួនពាក់ព័ន្ធនឹងអំពើហិង្សាក្នុងគ្រួសារ និងផ្លូវភេទ ។
ក្រមព្រហ្មទណ្ឌ (ឆ្នាំ ២០០៩)
ក្រមព្រហ្មទណ្ឌ ចែងពីបទល្មើសព្រហ្មទណ្ឌ និងទោសទណ្ឌចំពោះអំពើមួយចំនួន ដូចជាឃាតកម្ម ហិង្សា រំលោភសេពសន្ថវៈ ប្រទូសកេរខ្មាស បៀតបៀនផ្លូវភេទ ការគំរាមកំហែង និងបទល្មើសព្រហ្មទណ្ឌផ្សេងទៀត
ខ្មែរ / អង់គ្លេស
ក្រមរដ្ឋប្បវេណី (២០០៧)
ក្រមរដ្ឋប្បវេណី ចែងអំពីសិទ្ធិ កាត្វកិច្ច និងដំណើរការផ្លូវច្បាប់សម្រាប់អាពាហ៍ពិពាហ៍ ការលែងលះ អភិបាលកិច្ចនិងការគាំទ្រកុមារ និងការបែងចែកទ្រព្យសម្បត្តិ ។
ខ្មែរ / អង់គ្លេស
ក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា (២០០៧)
ក្រមនេះ ចែងអំពីនីតិវិធីស្វែងរកយុត្តិធម៌ព្រហ្មទណ្ឌនៅកម្ពុជា ដែលរួមមាន សិទ្ធិរបស់ដើមបណ្តឹងដើម្បីមានមេធាវី ស្នើសុំសំណង និងសវនាការអសាធារណៈជាដើម ។ ក្រមនេះ ក៏បានចែងពីការទទួលខុសត្រូវរបស់នគរបាលមានសមត្ថកិច្ច ប្រសិនបើពួកគេពុំបានបំពេញតួនាទីត្រឹមត្រូវនៅពេលមានភស្តុតាងនៃអំពើហិង្សា ។
ខ្មែរ / អង់គ្លេស
ច្បាប់ស្តីពីការទប់ស្កាត់អំពើហិង្សាក្នុងគ្រួសារ និងកិច្ចការពារជនរងគ្រោះ (២០០៥)
ច្បាប់នេះនិយាយអំពីអំពើហិង្សាក្នុងគ្រួសារ កាតព្វកិច្ចរបស់អាជ្ញាធរក្នុងការអន្តរាគមន៍លើករណីអំពើហិង្សា និងដំណើរការនៃការដោះស្រាយ និង/ឬសម្រុះសម្រួល និងនីតិវិធីក្នុងការទទួលបានដីការក្សាការពារ និងការសម្រេចចិត្តផ្នែករដ្ឋបាលនានា ។
ខ្មែរ / អង់គ្លេស
ប្រកាសរួមស្តីពីក្រមប្រតិបត្តិប្រព័ន្ធផ្សព្វផ្សាយសម្រាប់ការរាយការណ៍ព័ត៌មានអំពើហិង្សាលើស្ត្រី (២០១៧)
ក្រមនេះបង្កើតឡើងក្នុងគោលបំណងឱ្យបណ្តាញសារព័ត៌មានធ្វើការចុះផ្សាយពីហិង្សាលើស្ត្រី ដោយធ្វើការរាយការណ៍បិទបាំងអត្តសញ្ញាណ ឬរូបភាពរបស់អ្នកត្រូវបានរងគ្រោះដោយអំពើហិង្សា ។
ខ្មែរ / អង់គ្លេស
សេចក្តីណែនាំស្តីពីនីតិវិធីដែលត្រូវអនុវត្តចំពោះជនរងគ្រោះជាអនីតិជននៅក្នុងសំណុំរឿងព្រហ្មទណ្ឌ (២០២៣)
សេចក្តីណែនាំនេះ លើកឡើងអំពីវិធានការការពារសុខុមាលភាពរបស់កុមារដែលឆ្លងកាត់ដំណាក់កាលនីតិវិធីច្បាប់ រួមមានការកាត់បន្ថយការសម្ភាសន៍ តម្រូវការឱ្យធ្វើដំណើរ និងការបង្ហាញខ្លួននៅចំពោះមុខជនសង្ស័យ ក៍ដូចជាការជួយឱ្យមានមេធាវី និងសវនាការអសាធារណៈ ។
ខ្មែរ
ទាញយក
សូមចុចលេីតំណភ្ជាប់ខាងក្រោម ដេីម្បីទាញយក និងរក្សាទុកប្រភពព័ត៌មានទាំងនេះ ពីគេហទំព័រនេះ ។
