ការប្រារព្ធទិវាពលកម្មអន្តរជាតិ ឆ្នាំ២០២៤
ចេញផ្សាយ ថ្ងៃទី១ ខែឧសភា ឆ្នាំ២០២៤សហព័ន្ធសហជីព សហជីព កម្មករនិយោជិត និងក្រុមសង្គមស៊ីវិលនៅក្នុងរាជធានីភ្នំពេញ បានប្រមូលផ្តុំគ្នា ប្រារព្ធទិវាពលកម្មអន្តរជាតិ នៅថ្ងៃពុធនេះ ។
ការប្រារព្ធទិវាត្រូវបានធ្វើឡើងនៅមុខទីស្តីការក្រសួងការងារ និងបណ្តុះបណ្តាលវិជ្ជាជីវៈ និងនៅក្បែររមណីយដ្ឋាន វត្តភ្នំ និងមុខរដ្ឋសភាជាតិ ។
មេដឹកនាំសហជីព និងកម្មករនិយោជិត បាននិយាយអំពីសមិទ្ធផលដែលអ្នកទាំងនោះសម្រេចបាននៅក្នុងចលនាទាមទារសិទិ្ធការងារ ប៉ុន្តែបានព្រមាន និងស្នើសុំឱ្យបញ្ឈប់ការចោទប្រកាន់ពីបទល្មើសព្រហ្មទណ្ឌ លើសមាជិកសហជីពនិងសកម្មជនសិទិ្ធការងារ ការរឹតត្បិតសិទិ្ធសេរីភាពកម្មករ និងសិទិ្ធក្នុងការតស៊ូមតិដើម្បីប្រាក់ឈ្នួលនិងលក្ខខណ្ឌការងារសមរម្យសម្រាប់បងប្អូនកម្មករនិយោជិត ។