សកម្មជនសិទិ្ធមនុស្សចំនួន ១១ នាក់ផ្សេងទៀត ត្រូវបានចាប់ និងឃាត់ខ្លួន
ចេញផ្សាយ ថ្ងៃទី២១ ខែមករា ឆ្នាំ២០១៤ប្រជាពលរដ្ឋចំនួន ១១ នាក់ផ្សេងទៀត ត្រូវបានឃាត់ខ្លួន បន្ទាប់ពីបានធ្វើការប្រមូលផ្តុំគ្នានៅមុខស្ថានទូតសហរដ្ឋអាមេរិក នៅក្នុងរាជធានីភ្នំពេញ កាលពីព្រឹកមិញនេះ ដើម្បីដាក់ញត្តិមួយដែលត្រូវបានចុះហត្ថលេខាដោយអង្គការចំនួន ១៨២ ក្នុងការអំពាវនាវឲ្យមានការដោះលែងសកម្មជនសិទិ្ធមនុស្ស និងកម្មករទាំង ២៣ នាក់ ដែលត្រូវបានឃុំខ្លួន អំឡុងពេលមានការបង្ក្រាបដោយហិង្សាកាលពីដើមខែនេះ។ អ្នកទាំង ១១ នាក់ រួមមានលោក រុង ឈុន ប្រធានសមាគមគ្រូបង្រៀនឯករាជ្យ (CITA) សកម្មជនដីធ្លីតំបន់បឹងកក់ អ្នកស្រី ទេព វន្នី អ្នកស្រី យ៉ោម បុប្ផា កញ្ញា សុង ស្រីលាភ អ្នកស្រី ផាន់ ឈុនរ៉េត កញ្ញា ប៊ូវ សោភា អ្នកស្រី អៀម ស្រីទូច អ្នកស្រី ងួន គីមឡាង សកម្មជនដីធ្លីតំបន់ថ្មគោលក្បែរអាកាសយានដ្ឋានអន្តរជាតិភ្នំពេញ អ្នកស្រី ឈួង សុភាព ក៏ដូចជាកញ្ញា ឡុង គីមហ៊ាង បុគ្គលិកក្រុមការងារសិទិ្ធលំនៅឋាន (HRTF) ហើយនិងអ្នកស្រី ឈាង ធីតា ជាសកម្មជនមកពីសម្ព័ន្ធសហជីពកម្ពុជា (CATU)។
លើសពីនេះ សាលាដំបូងរាជធានីភ្នំពេញទើបតែបានជូនដំណឹងមកក្រុមមេធាវីអង្គការមិនមែនរដ្ឋាភិបាលថា អ្នកទាំង ២២ នាក់ក្នុងចំណោមអ្នកទាំង ២៣ នាក់ដែលត្រូវបានឃុំខ្លួននៅមណ្ឌលកែប្រែ ម៣ កាលពីដើមខែនេះ មិនអាចអនុញ្ញាតឲ្យនៅក្រៅឃុំបណ្តោះអាសន្នរង់ចាំសវនាការនោះឡើយ។ ថ្ងៃផុតកំណត់នៃការប្រកាសសេចក្តីសម្រេចរបស់សាលាឧទ្ធរណ៍អំពីការអនុញ្ញាតឲ្យនៅក្រៅឃុំបណ្តោះអាសន្នរង់ចាំសវនាការសម្រាប់លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) គឺនៅថ្ងៃទី៣ ខែកុម្ភៈ ឆ្នាំ២០១៤។
- ចំណងជើង & មូលបទ
- សិទិ្ធបញ្ចេញមតិ និងចូលរួម ដោះលែង ២៣ នាក់ រ៉ុង ឈុន