សាលាឧទ្ធរណ៍តំកល់សេចក្តីសម្រេចសាលាដំបូង ផ្តន្តាទោសសមាជិកនិងអ្នកគាំទ្រគណបក្សជំទាស់ ពីបទក្លែងឯកសារ
ចេញផ្សាយ ថ្ងៃទី៣០ ខែវិច្ឆិកា ឆ្នាំ២០២៣នាថ្ងៃនេះ សាលាឧទ្ធរណ៍ភ្នំពេញ បានសម្រេចតំកល់ការផ្តន្ទាទោសលោក សៀម ភ្លុក សហស្ថាបនិកគណបក្សបេះដូងជាតិខ្មែរ និងសមាជិកនិងអ្នកគាំទ្រគណបក្សនេះចំនួន បីនាក់ផ្សេងទៀត (អ្នកស្រី នូ សិទ្ធារី លោក ខឿន វីរ៉ាត់ និងលោក តូច ថឹង) ដោយចោទប្រកាន់ពីបទក្លែងបន្លំ និងបទប្រើប្រាស់ឯកសារក្លែង តាមបញ្ញត្តិមាត្រា៦២៦ មាត្រា៦២៧ មាត្រា៦២៨ នៃក្រមព្រហ្មទណ្ឌ ។ សេចក្តីសម្រេចរបស់សាលាឧទ្ធរណ៍ ត្រូវបានប្រកាស ក្រោយពេលបញ្ចប់សវនាការ កាលពីព្រឹកនេះ ។
កាលពីថ្ងៃទី២៤ ខែមីនា ឆ្នាំ ២០២៣ សាលាដំបូងរាជធានីភ្នំពេញ បានផ្តន្ទាទោសលោក សៀម ភ្លុក និងមនុស្ស ១២ នាក់ ផ្សេងទៀត ដែលរួមមានអ្នកទាំងបីនាក់ខាងលើផងដែរ ។ ជាលទ្ធផល សាលាឧទ្ធរណ៍នាថ្ងៃនេះ បានសម្រេចតំកល់សេចក្តីសម្រេចរបស់សាលាដំបូង ដោយផ្តន្ទាទោស លោក សៀម ភ្លុក ដាក់ពន្ធនាគារចំនួន ២ ឆ្នាំកន្លះ និងពិន័យជាប្រាក់ ៥ លានរៀល (ប្រហែល ១,២៥០ ដុល្លារអាមេរិក) ។ ចំនែកឯអ្នកទាំងបី ខាងលើ ត្រូវបានផ្តន្ទាទោស ដាក់ពន្ធនាគារចំនួន ២ ឆ្នាំ និងពិន័យជាប្រាក់ដូចគ្នានឹងករណីលោក សៀម ភ្លុក ។