សមាជិកសហគមន៍សំរោងត្បូង រងការបៀតបៀន ក្រោយទទួលការជូនដំណឹងពីការបណ្តេញចេញ
ចេញផ្សាយ ថ្ងៃទី១០ ខែឧសភា ឆ្នាំ២០២៤កងកម្លាំងនគរបាល និងកងសន្តិសុខខណ្ឌជាច្រើននាក់ បានបិទផ្លូវ រារាំងការដើរក្បួនរបស់សមាជិកសហគមន៍សំរោងត្បូងចំនួនប្រមាណ ៦០ នាក់ ដែលកំពុងរស់នៅក្នុងបឹងតាមោក ដែលឋិតនៅភាគខាងជើងរាជធានីភ្នំពេញ ។ នាព្រឹកនេះ អាជ្ញាធរប្រើអំពើហិង្សា និងរុញច្រានសមាជិកសហគមន៍ ដែលកំពុងដើរឆ្ពោះទៅកាន់សាលាខណ្ឌព្រែកព្នៅ ដើម្បីជួបមន្ត្រីខណ្ឌ ក្រោយពេលដែលពលរដ្ឋចំនួន ៦ គ្រួសារ ក្នុងសហគមន៍ ទទួលបានការជូនដំណឹងពីការបណ្តេញចេញពីលំនៅឋាន ។ ការជូនដំណឹងនេះ ត្រូវបានធ្វើឡើងកាលពីថ្ងៃទី០៨ ខែឧសភា ឱ្យគ្រួសារទាំងនោះចាកចេញ ដើម្បីទុកដីសាងសង់ផ្លូវ ។
កងកម្លាំងនគរបាល និងកងសន្តិសុខប្រមាណជាង ៦០ នាក់ បានរារាំងសមាជិកសហគមន៍ទាំងនោះ ដោយបានរុញច្រានអ្នកទាំងនោះ ឱ្យថយក្រោយ ប្រើប្រាស់អំពើហិង្សាសមាជិកសហគមន៍មួយចំនួន និងរារាំងអ្នកទាំងនោះ មិនឱ្យដើរក្បួនឆ្ពោះទៅកាន់សាលាខណ្ឌ ។ ពលរដ្ឋទាំងនោះ ត្រូវបានអាជ្ញាធរបង្ខំឱ្យដើរត្រឡប់ទៅកាន់ផ្ទះរបស់ពួកគេវិញ ដោយមានការអមដោយកងកម្លាំងសន្តិសុខជាច្រើន ។
សមាជិកសហគមន៍សំរោងត្បូងជាច្រើននាក់ បានប្រឈមនឹងការរំលោភបំពានពីសំណាក់កងកម្លាំងនគរបាល ការចោទប្រកាន់ពីបទល្មើសព្រហ្មទណ្ឌជាច្រើន និងការគំរាមកំហែងនៃការបណ្តេញចេញដោយបង្ខំ នៅខណៈដែលរាជរដ្ឋាភិបាលបានកាត់ដី និងលុបមួយភាគធំនៃផ្ទៃបឹងតាមោក ដោយប្រគល់ទៅឱ្យក្រសួងមួយចំនួន មន្ត្រីរាជការមួយចំនួន និងបុគ្គលឯកជនជាច្រើនដែលមានទំនាក់ទំនងជិតស្និតនឹងអ្នកមានអំណាច ។
សមាជិកសហគមន៍ជាច្រើននាក់ បានរងរបួស អំឡុងពេលប៉ះទង្គិចគ្នាជាមួយអាជ្ញាធរ កាលពីខែកុម្ភៈ នៅពេលដែលអាជ្ញាធរព្យាយាមចាក់ដីលុបបឹង ជាកន្លែងដែលពលរដ្ឋតែងតែនេសាទត្រី ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី