ក្រោយចូលឆ្នាំថ្មី អំពើហិង្សានៅតែបន្តកើតមាននៅទីលានប្រជាធិបតេយ្យ
ចេញផ្សាយ ថ្ងៃទី២១ ខែមេសា ឆ្នាំ២០១៤
នៅព្រឹកនេះ កងសន្តិសុខបានបង្ក្រាបទៅលើយុវជនគណបក្សសង្គ្រោះជាតិ បុគ្គលិកអង្គការមិនមែនរដ្ឋាភិបាល អ្នកកាសែតជាតិ និងអន្តរជាតិជាច្រើននាក់ នៅពេលដែលអ្នកទាំងនោះ បានប្រមូលផ្តុំគ្នា ជាមួយនឹងអ្នកស្រីមួរ សុខហួរ ដែលជាការព្យាយាមជាថ្មីម្តងទៀត ក្នុងការចូលទៅកាន់ទីលានប្រជាធិបតេយ្យ។ អង្គការ លីកាដូ បានផ្តល់នូវការព្យាបាលដល់មនុស្សចំនួន ៧នាក់ បន្ទាប់ពីមានការបង្ក្រាបយ៉ាងហិង្សាមក។ មនុស្សចំនួន ២នាក់ បានរងរបួសខាងក្រៅ ហើយម្នាក់ទៀត រងរបួសធ្ងន់ធ្ងរដោយមានចេញឈាមនៅត្រង់ត្រចៀក។ អ្នកស្រី មួរ សុខហួរ ត្រូវបានសែងចេញដោយកងសន្តិសុខជាច្រើននាក់ ហើយទទួលរងរបួសបន្តិចបន្ទួច។
នេះ គឺជាការប៉ុនប៉ងព្យាយាមចូលទៅកាន់ទីលានលើកទី ៦ ហើយរបស់អ្នកតំណាងរាស្ត្រ អ្នកស្រី មួរ សុខហួរ ចាប់តាំងពីមានបំរាមជួបជុំជាសាធារណៈ កាលពីដើមខែមករា។ ការព្យាយាមរបស់អ្នកស្រី ត្រូវបានរារាំងដោយកងសន្តិសុខជាច្រើននាក់។ អ្នកស្រី បានធ្វើការតវ៉ា ដើម្បីទាញឲ្យមានការចាប់អារម្មណ៍អំពីភាពអន់ថយនូវសេរីភាពក្នុងការបញ្ចេញមតិនៅក្នុងប្រទេស។
- ចំណងជើង & មូលបទ
- សិទិ្ធបញ្ចេញមតិ និងចូលរួម អំពើនៅទីលានប្រជាធិបតេយ្យ ២០១៤
