ពីរថ្ងៃក្រោយផ្អាកបណ្តោះអាសន្នរបស់នាយករដ្ឋមន្ត្រី ភ្នាក់ងារជ្រើសរើសពលករ នៅតែបំពានក្នុងការបញ្ជូនពលករទៅប្រទេសម៉ាឡេស៊ី
ចេញផ្សាយ ថ្ងៃទី១៧ ខែតុលា ឆ្នាំ២០១១
ភ្នាក់ងារជ្រើសរើសពលករក្នុងប្រទេសកម្ពុជា នៅតែបន្តបញ្ជូនពលករជាស្រ្តីជំនួយការផ្ទះទៅប្រទេសម៉ាឡេស៊ី កាលពីព្រឹកថ្ងៃច័ន្ទនេះ បើទោះជាមានសារាចរពីនាយករដ្ឋមន្ត្រីកាលពីថ្ងៃសៅរ៍ បង្គាប់ឲ្យផ្អាកបណ្តោះអាសន្ន ចំពោះទង្វើរបស់ភ្នាក់ងារទាំងនោះ។
ក្រុមអ្នកឃ្លាំមើលសិទ្ធិមនុស្សរបស់អង្គការលីកាដូ បានសង្កេតឃើញថា នៅព្រលានយន្តហោះអន្តរជាតិពោធ៌ចិនតុង មានស្រ្តីបម្រើការងារតាមផ្ទះជនជាតិខ្មែរយ៉ាងតិច២៥នាក់ បានមកធ្វើដំណើរតាមក្រុមហ៊ុនអាកាសចរអាស៊ី ដែលមានជើងហោះហើរ AK273 ទៅកាន់ទីក្រុងកុឡាឡំពួ នៅព្រឹកថ្ងៃទី ១៧ ខែតុលា ឆ្នាំ២០១១។ ពលករទាំងនោះ ត្រូវបានគេមើលឃើញជាទូទៅមានសក់ខ្លី និងឯកសណ្ឋានសំគាល់ ដោយមានពាក់អាវយឺតដៃខ្លី ភ្ជាប់នៅនឹងឈ្មោះទីភ្នាក់ងារជ្រើសរើសពលករ។ ក្រុមអ្នកឃ្លាំមើលសិទ្ធិមនុស្សរបស់ អង្គការលីកាដូ បានទទួលការបញ្ជាក់ពីគោលដៅដែលស្ត្រីទាំងនោះនឹងត្រូវទៅដល់ តាមរយៈការសាកសួរទៅកាន់បុគ្គលិករបស់ភ្នាក់ងារជ្រើសរើសពលករ ដែលកំពុងសំរបសំរួលនូវការចាកចេញនេះ។
ស្រ្តីបម្រើការងារតាមផ្ទះទាំងនោះ មកពីភ្នាក់ងារពីរផ្សេងគ្នា ស្រ្តីចំនួន ១៨នាក់ មកពីក្រុមហ៊ុន អាយអាយអេស (IIS Co,Ltd.) និង ៧ នាក់ ផ្សេងទៀតមកពីក្រុមហ៊ុន ថប មែនផោវ័រ (Top Manpower.)។ គួរអោយកត់សំគាល់ផងដែរថា នាយកក្រុមហ៊ុនចុងក្រោយនេះ ក៍ជាប្រធានសមាគមនៃភ្នាក់ងារជ្រើសរើសពលករកម្ពុជា មានអក្សរកាត់ហៅថា (ACRA) ដែលជាបណ្តាញនៃទីភ្នាក់ងារជ្រើសរើស និងនាំចេញពលករមួយយ៉ាងធំនៅកម្ពុជា។ គេហទំព័រនៃសមាគមនេះបានបង្ហាញនូវការប្តេជ្ញាចិត្តយ៉ាងមុតមាំថា នឹងធ្វើអោយមានទំនួលខុសត្រូវផ្នែកសង្គម មានវិជ្ជាជីវៈខ្ពស់ក្នុងការផ្តល់ការងារទៅក្រៅប្រទេស ជាមួយនឹងការស្វះស្វែងក្នុងការលើកកម្ពស់សុវត្តភាព ដល់ពលករកម្ពុជាដែលទៅធ្វើការនៅបរទេស។
កញ្ញា ណាលី ពីឡួក នាយិកាអង្គការលីកាដូបានធ្វើការកត់សម្គាល់ថា ខណៈពេលដែលយើងសាទរចំពោះសារាចរស្តីពីការផ្អាកបណ្តោះអាសន្ន ដែលចេញដោយនាយករដ្ឋមន្ត្រីកាលពីថ្ងៃសៅរ៍ វាទំនងជាភ្នាក់ងារជ្រើសរើសពលករខ្លះបានគិតថា សារាចរនេះមិនគ្របដណ្តប់ក្នុងការងារប្រចាំថ្ងៃរបស់ខ្លួនទេ។ កញ្ញា ពីឡូកបានសង្គត់ធ្ងន់ថា សារាចររបស់នាយករដ្ឋមន្ត្រី ដែលឆ្លើយតបនិងសភាពការណ៍ពេលនេះ វាជាការចាំបាច់ត្រូវអនុវត្តអោយបានតឹងរឹងបំផុត។ សារាចរនេះច្បាស់លាស់ណាស់ គឺផ្អាកមិនឲ្យមានការបញ្ជូនពលករបម្រើការងារតាមផ្ទះទៅប្រទេសម៉ាឡេស៊ី។
បុគ្គលិកម្នាក់នៃក្រុមហ៊ុន ថប មែនផោវ័រ អះអាងថា ស្រ្តីដែលចាកចេញកាលពីថ្ងៃច័ន្ទនោះ មិនត្រូវបានគ្របដណ្តប់ដោយសារាចរនេះទេ ដោយហេតុថាពួកគេបានចុះហត្ថាលេខាលើកិច្ចសន្យាការងារមុនសារាចរនេះចេញទៅទៀត។ បុគ្គលិកដដែលនេះក៍បាននិយាយថា ពលករស្រ្តីដែលបានជ្រើសរើស ពីក្រុមហ៊ុនរបស់គាត់ ហើយដែលកំពុងទទួលការបណ្តុះបណ្តាល ក៍មិនត្រូវអនុវន្តដោយសារាចរនេះដែរ ពីព្រោះពួកគេបានចុះកិច្ចសន្យារួចហើយ។
នាយិកាអង្គការលីកាដូ ពិនិត្យឃើញថា វាច្បាស់ណាស់ថា ភ្នាក់ងារជ្រើសរើសពលករទាំងនេះ គ្មានចេតនាអនុវត្តតាមសារាចរនៅពេលនេះទេ។ ពួកគេមានផែនការបញ្ចេញពលករស្រ្តីបម្រើតាមផ្ទះ ឲ្យអស់ពី មណ្ឌលភ្នាក់ងារជ្រើសរើសពលកររបស់ពួកគេ ដើម្បីជាការទូទាត់លើការវិនិយោគរបស់ពួកគេ។ ម្តងវិញទៀត ស្រ្តីពលករទាំងនេះ ត្រូវបានគេចាត់ទុកដូចជាវត្ថុ។
អង្គការលីកាដូមានជំនឿថា ស្រ្តីដែលកំពុងស្នាក់នៅក្នុងមណ្ឌលភ្នាក់ងារជ្រើសរើសពលករ គួរតែត្រូវបានបញ្ជូនត្រលប់ទៅផ្ទះរបស់ពួកគេវិញ មិនមែនបញ្ជូនទៅប្រទេសម៉ាឡេស៊ីនោះទេ។ តាមការពិនិត្យជាក់ស្តែង ការផ្អាកនោះបានចូលជាធរមានហើយ។ រដ្ឋាភិបាលកម្ពុជាបានពិនិត្យឃើញថា មានបាតុភាពអវិជ្ជមានក្នុងវិស័យនេះ ហេតុដូចនេះវាមិនមានសុវត្ថភាពទៀតឡើយ ចំពោះពលករជាស្ត្រីទាំងនោះដែលត្រូវបញ្ជូនទៅប្រទេសម៉ាឡេស៊ីនាពេលនេះ។ អំណះអំណាងរបស់ភ្នាក់ងារជ្រើសរើសពលករ ដែលបានលើកឡើងខាងលើនោះ វាធ្វើឲ្យមានគុណវិបត្តិក្នុងការអនុវត្ត និងផ្ទុយស្រឡះពី ឆន្ទៈនិង ខ្លឹមសារនៃសារាចររបស់នាយករដ្ឋមន្ត្រី។
លោក ហម ស៊ុនរិទ្ធិ នាយករងផ្នែកស៊ើបអង្កេត និងការពារសិទ្ធិមនុស្ស របស់អង្គការលីកាដូ បានបន្ថែមថាបន្ទុកនៃការផ្អាកនេះ គួរតែដាក់នៅលើស្មាររបស់ក្រុមហ៊ុន មិនមែនដាក់នៅលើស្មានៃស្រ្តីខ្មែរក្រីក្រនោះទេ។ស្ត្រីទាំងនោះត្រូវការឲ្យមានការការពារយ៉ាងតឹងរឹង ពីការបញ្ជូនទៅកាន់បរិយាកាសដែលមានការរំលោភបំពាននោះ។
អង្គការលីកាដូ សូមអំពាវនាវ និងគាំទ្រដល់អាជ្ញាធរដែលពាក់ព័ន្ធគ្រប់ថ្នាក់ ក្នុងការអនុវត្តនូវសារាចរនាយករដ្ឋមន្ត្រីឲ្យបានពេញលេញ និងត្រឹមត្រូវ ដោយឥតលើកលែង ជាពិសេស នគរបាលអន្តោប្រវេសន៍គួរតែមានការប្រុងប្រយ័ត្នខ្ពស់ ដើម្បីរារាំងទីភ្នាក់ងារជ្រើសរើសពលករណា ដែលបំពានលើសារាចរ។
នាយិកាអង្គការលីកាដូ បានសង្កត់ធ្ងន់ចំពោះរឿងនេះថា ការផ្អាកគឺជាការផ្អាកមែនទែន។ សូម្បីតែប្រជាពលករខ្មែរណាម្នាក់ ក៍មិនត្រូវបញ្ជូនទៅប្រទេសម៉ាឡេស៊ីដែរ ដរាបណាមានការការពារសុវត្ថភាព ដ៍ត្រឹមត្រូវដើម្បីការពារជនចំណាកស្រុកដែលស្វែងរកការងារធ្វើ និងដរាបណារាជរដ្ឋាភិបាល កម្ពុជាជូនដំណឹងថ្មីអំពីបញ្ហានេះ។
សម្រាប់ព័ត៌មានបន្ថែម សូមទាក់ទង៖
▪ កញ្ញា ណាលី ពីឡូក នាយិកាអង្គការលីកាដូ ០១២ ៨០៣ ៦៥០
▪ លោក អំ សំអាត អ្នកគ្រប់គ្រងបច្ចេកទេសអង្គការលីកាដូ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- សិទ្ធិការងារ សិទ្ធិស្ត្រី
