ស្វែងរក
អត្ថបទខ្លីៗ | បេក្ខជនឈរឈ្មោះក្រុមប្រឹក្សាមកពីគណបក្សជំទាស់ ត្រូវចាប់ខ្លួន ឯសាលក្រមផ្តន្ទាទោសប្រធានគណបក្សបេះដូងជាតិ ត្រូវបានតម្កល់
ថ្ងៃទី១៥ ខែឧសភា ឆ្នាំ២០២៤
សាលាដំបូងខេត្តបាត់ដំបង បានសម្រេចចោទប្រកាន់ និងឃុំខ្លួនបណ្តោះអាសន្ន បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាខេត្ត មកពីគណបក្សឆន្ទៈខ្មែរមួយរូប កាលពីថ្ងៃច័ន្ទនេះ ។ ការចាប់ខ្លួននេះ ត្រូវបានធ្វើឡើងមិនដល់ ២ សប្តាហ៍ មុនការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ ។ នៅថ្ងៃដដែលនោះ ស្ថាបនិកម្នាក់មកពីគណបក្សជំទាស់មួយផ្សេងទៀត ដែលកំពុងជាប់ពន្ធនាគារ ត្រូវបានតុលាការកំពូលតម្កល់សាលក្រមផ្តន្ទាទោសលើរូបលោក ។
លោក ភូ សុវណ្ណថា ដែលជាបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាខេត្ត មកពីគណបក្សឆន្ទៈខ្មែរ និងជាអតីតប្រធានប្រតិបត្តិគណបក្សភ្លើងទៀនខេត្តបាត់ដំបង ត្រូវបានអាជ្ញាធរចាប់ខ្លួននៅថ្ងៃច័ន្ទ ក្រោយពេលលោកត្រូវបានតុលាការកោះហៅឱ្យចូលឆ្លើយបំភ្លឺ ។ លោក សុវណ្ណថា ត្រូវបានបញ្ជូនខ្លួនទៅឃុំជាបណ្តោះអាសន្ន កាលពីថ្ងៃច័ន្ទ ក្រោមបទចោទ បរិហារកេរ្តិ៍ជាសាធារណៈ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម តាមរយៈបណ្តឹងមួយរបស់អតីតសហការីរបស់លោក ដែលបច្ចុប្បន្នជាសមាជិកម្នាក់របស់គណបក្សកាន់អំណាច ។ បណ្តឹងនេះ ត្រូវបានធ្វើឡើង ដោយផ្អែកលើការបង្ហោះសាររបស់លោក សុវណ្ណថា នៅលើបណ្តាញសង្គមហ្វេសប៊ុករបស់លោក ។
រីឯករណីមួយទៀត កាលពីថ្ងៃច័ន្ទដដែល តុលាការកំពូលបានសម្រេចតម្កល់ការផ្តន្ទាទោស លោក សៀម ភ្លុក សហស្ថាបនិកម្នាក់ នៃគណបក្សបេះដូងជាតិ និងជនជាប់ចោទ ៣ រូបផ្សេងទៀត ពីបទក្លែងបន្លំ និងប្រើប្រាស់លិខិតក្លែង ។ សាលាដំបូងរាជធានីភ្នំពេញ បានផ្តន្ទាទោសឱ្យលោក ភ្លុក ជាប់ពន្ធនាគារចំនួន ៣០ ខែ និងពិន័យជាប្រាក់ ៥ លានរៀល (ប្រហែល ១.២៥០ ដុលា្លអាមេរិក) ទៅលើការចោទប្រកាន់ដែលថា លោក បានក្លែងឯកសារដែលមានស្នាមមេដៃអ្នកគាំទ្រ អំឡុងពេលដែលគណបក្សនេះព្យាយាមចុះបញ្ជីគណបក្សនយោបាយ ប៉ុន្តែត្រូវបានក្រសួងមហាផ្ទៃបដិសេធ កាលពីឆ្នាំ២០២១ ។
ថ្ងៃទី១០ ខែឧសភា ឆ្នាំ២០២៤
កងកម្លាំងនគរបាល និងកងសន្តិសុខខណ្ឌជាច្រើននាក់ បានបិទផ្លូវ រារាំងការដើរក្បួនរបស់សមាជិកសហគមន៍សំរោងត្បូងចំនួនប្រមាណ ៦០ នាក់ ដែលកំពុងរស់នៅក្នុងបឹងតាមោក ដែលឋិតនៅភាគខាងជើងរាជធានីភ្នំពេញ ។ នាព្រឹកនេះ អាជ្ញាធរប្រើអំពើហិង្សា និងរុញច្រានសមាជិកសហគមន៍ ដែលកំពុងដើរឆ្ពោះទៅកាន់សាលាខណ្ឌព្រែកព្នៅ ដើម្បីជួបមន្ត្រីខណ្ឌ ក្រោយពេលដែលពលរដ្ឋចំនួន ៦ គ្រួសារ ក្នុងសហគមន៍ ទទួលបានការជូនដំណឹងពីការបណ្តេញចេញពីលំនៅឋាន ។ ការជូនដំណឹងនេះ ត្រូវបានធ្វើឡើងកាលពីថ្ងៃទី០៨ ខែឧសភា ឱ្យគ្រួសារទាំងនោះចាកចេញ ដើម្បីទុកដីសាងសង់ផ្លូវ ។
កងកម្លាំងនគរបាល និងកងសន្តិសុខប្រមាណជាង ៦០ នាក់ បានរារាំងសមាជិកសហគមន៍ទាំងនោះ ដោយបានរុញច្រានអ្នកទាំងនោះ ឱ្យថយក្រោយ ប្រើប្រាស់អំពើហិង្សាសមាជិកសហគមន៍មួយចំនួន និងរារាំងអ្នកទាំងនោះ មិនឱ្យដើរក្បួនឆ្ពោះទៅកាន់សាលាខណ្ឌ ។ ពលរដ្ឋទាំងនោះ ត្រូវបានអាជ្ញាធរបង្ខំឱ្យដើរត្រឡប់ទៅកាន់ផ្ទះរបស់ពួកគេវិញ ដោយមានការអមដោយកងកម្លាំងសន្តិសុខជាច្រើន ។
សមាជិកសហគមន៍សំរោងត្បូងជាច្រើននាក់ បានប្រឈមនឹងការរំលោភបំពានពីសំណាក់កងកម្លាំងនគរបាល ការចោទប្រកាន់ពីបទល្មើសព្រហ្មទណ្ឌជាច្រើន និងការគំរាមកំហែងនៃការបណ្តេញចេញដោយបង្ខំ នៅខណៈដែលរាជរដ្ឋាភិបាលបានកាត់ដី និងលុបមួយភាគធំនៃផ្ទៃបឹងតាមោក ដោយប្រគល់ទៅឱ្យក្រសួងមួយចំនួន មន្ត្រីរាជការមួយចំនួន និងបុគ្គលឯកជនជាច្រើនដែលមានទំនាក់ទំនងជិតស្និតនឹងអ្នកមានអំណាច ។
ថ្ងៃទី៩ ខែឧសភា ឆ្នាំ២០២៤
នៅព្រឹកនេះ ប្រធានគណបក្សកម្លាំងជាតិ ត្រូវបានអាជ្ញាធរចាប់ខ្លួន នៅឯអាកាសយានដ្ឋានអន្តរជាតិភ្នំពេញ តាមដីកាបញ្ជាឱ្យចូលខ្លួនរបស់ព្រះរាជអាជ្ញាអមសាលាដំបូងរាជធានីភ្នំពេញ ដើម្បីសាកសួរនៅឯការិយាល័យសន្តិសុខផ្ទៃក្នុង ផែនការងារសន្តិសុខ នៃស្នងការដ្ឋាននគរបាលរាជធានីភ្នំពេញ ។ ការចាប់ខ្លួននេះ ត្រូវបានធ្វើឡើង នៅពេលដែលលោកទើបត្រឡប់មកពីជួបអ្នកគាំទ្ររបស់លោកនៅឯប្រទេសជប៉ុន ។
លោក ស៊ុន ចន្ធី ត្រូវបានចាប់ខ្លួនដោយកងកម្លាំងនគរបាល កាលពីម៉ោង ៩ ព្រឹកនេះ ដោយយោងតាមសេចក្តីប្រកាសព័ត៌មានរបស់អ្នកនាំពាក្យនៃស្នងការដ្ឋាននគរបាលរាជធានីភ្នំពេញ ដោយបានបញ្ជាក់ថា ការចាប់ខ្លួនលោក ចន្ធី គឺតាមដីកាបញ្ជាឱ្យចូលខ្លួន ដើម្បីសាកសួរពីសំណុំរឿង “ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” តាមមាត្រា ៤៩៥ នៃក្រមព្រហ្មទណ្ឌ ។
ដីកាបញ្ជាឱ្យចូលខ្លួនមួយ ត្រូវបានចេញដោយអយ្យការអមសាលាដំបូងរាជធានីភ្នំពេញ ចុះថ្ងៃទី០៧ ខែឧសភា ដោយបង្គាប់ឱ្យនគរបាល ចាប់ខ្លួនលោក ចន្ធី និងនាំខ្លួនលោក នៅមុខការិយាល័យសន្តិសុខផ្ទៃក្នុង ផែនការងារសន្តិសុខ នៃស្នងការដ្ឋាននគរបាលរាជធានីភ្នំពេញ ។ ដីកាបញ្ជាឱ្យចូលខ្លួន ត្រូវបានចុះហត្ថលេខាដោយព្រះរាជអាជ្ញា ច្រឹង ខ្មៅ នៅថ្ងៃតែមួយដែលគណបក្សកម្លាំងជាតិបង្ហោះវីដេអូមួយនៅលើគេហទំព័របណ្តាញសង្គមរបស់លោក ចន្ធី ដែលកំពុងនិយាយទៅកាន់អ្នកគាំទ្ររបស់លោក នៅឯប្រទេស ជប៉ុន ។
ថ្ងៃទី៨ ខែឧសភា ឆ្នាំ២០២៤
លោក ម៉ម រិទ្ធី ដែលជាអនុប្រធានសហភាពការងារកម្ពុជា (CLC) ត្រូវបានអាជ្ញាធរចាប់ខ្លួន កាលពីយប់មិញ នៅខាងក្រៅការិយាល័យរបស់សហជីព ក្រោយពេលលោកត្រូវបានសាលាដំបូងរាជធានីភ្នំពេញ សម្រេចផ្តន្ទាទោសដោយកំបាំងមុខ ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងធ្វើឱ្យបាត់ជំនឿលើសេចក្តីសម្រេចរបស់តុលាការ ។ លោកត្រូវបានតុលាការផ្តន្ទាទោស ដាក់ពន្ធនាគារចំនួន ១៨ ខែ កាលពីថ្ងៃអង្គារ៍ កន្លងទៅ ។
ក្រៅពីជាអនុប្រធានសហភាពការងារកម្ពុជា លោក រិទ្ធី ដែលមានអាយុ ៣៥ ឆ្នាំ ក៏ជាប្រធានសហព័ន្ធសហជីពកម្មករនិយោជិតវិស័យទេសចរណ៍សេវាកម្មកម្ពុជា (CTSWF) ។ លោកត្រូវបានតុលាការផ្តន្ទាទោស ពាក់ព័ន្ធនឹងការចេញផ្សាយនូវវីដេអូមួយ កាលពីថ្ងៃទី២៤ ខែកុម្ភៈ ឆ្នាំ២០២២ នៅលើបណ្តាញសង្គមហ្វេសប៊ុករបស់លោក ដែលលោកបានរិះគន់ការចាប់ខ្លួនសមាជិកសហជីពរបស់លោក នៅកាស៊ីណូ ជីន ប៉ី ខេត្តព្រះសីហនុ ។
សាលក្រមផ្តន្ទាទោសខាងលើ ត្រូវបានចេញ ដោយមិនមានវត្តមានរបស់លោក ឬមេធាវីរបស់លោកនោះទេ ក្រោយពេលដែលមេធាវីរបស់លោក បានដាក់ពាក្យស្នើសុំពន្យារពេល ដោយសារមេធាវីជាប់រវល់ ។ តុលាការបានរកឃើញថាលោកមានពិរុទ្ធភាព ពីបទ ញុះញង់ យោងតាមមាត្រា ៤៩៤ និង ៤៩៥ និងបទ “ឱ្យបាត់ជំនឿលើសេចក្តីសម្រេចរបស់តុលាការ” យោងតាមមាត្រា ៥២៣ នៃក្រមព្រហ្មទណ្ឌ និងពិន័យជាប្រាក់ចំនួន ២ លានរៀល (ប្រមាណ ៥០០ ដុល្លារអាមេរិក) ។
ថ្ងៃទី៣ ខែឧសភា ឆ្នាំ២០២៤
នាព្រឹកនេះ តុលាការកំពូលបានសម្រេចតម្កល់ការផ្តន្ទាទោសលេីអតីត និងបច្ចុប្បន្នជាថ្នាក់ដឹកនាំ និងសមាជិកសហជីពណាហ្គាវេីលដ៏ ដែលធ្វេីឱ្យប្រធានសហជីពទ្រទ្រង់សិទ្ធិការងារ បុគ្គលិកកម្មករខ្មែរ នៃក្រុមហ៊ុនណាហ្គាវើលដ៏ កញ្ញា ឈឹម ស៊ីថរ បន្តជាប់ពន្ធនាគារដដែល ។
នាព្រឹកថ្ងៃទី ០៣ ខែឧសភា នេះ ក្រុមប្រឹក្សាជំនុំជម្រះដែលមានសមាសភាពចៅក្រមចំនួន ០៤ រូប បានប្រកាសសាលដីការបស់ខ្លួន ដោយតម្កល់សេចក្ដីសម្រេចផ្តន្ទាទោសពន្ធនាគារ លេីជនជាប់ចោទទាំង ៨ រូប ។ ទោសពន្ធនាគាររបស់អ្នកទាំងនោះ ចាប់ពី ១ ទៅ ២ ឆ្នាំ ។ ស៊ីថរ ជាជនជាប់ចោទម្នាក់ប៉ុណ្ណោះ ដែលកំពុងជាប់ពន្ធនាគារ លេីទោសរយៈពេល ២ ឆ្នាំ ។
នៅពេលដែលស៊ីថរ នឹងត្រូវជាប់ទោសពន្ធនាគារចប់សព្វគ្រប់នៅក្នុងឆ្នាំនេះ ការសម្រេចតម្កល់ការផ្តន្ទាទោសនាថ្ងៃនេះ អាចនឹងធ្វើឱ្យជនជាប់ចោទចំនួន ៥ នាក់ទៀត ត្រូវអាជ្ញាធរបញ្ជូនខ្លួនទៅពន្ធនាគារភ្លាមៗ ។ អ្នកទាំង ៥ រួមមានអ្នកស្រី ឈឹម សុខន អ្នកស្រី ហៃ សុភាព អ្នកស្រី ឃ្លាំង សុបិន្ត កញ្ញា សុន ស្រីពេជ្រ និងអ្នកនាង ទូច សិរីមាស ត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារចំនួន ១៨ខែ ។
ថ្ងៃទី៧ ខែមេសា ឆ្នាំ២០២៤
នៅថ្ងៃនេះ លោក កេីត សារ៉ាយ ប្រធានសមាគមសម្ព័ន្ធនិស្សិតបញ្ញវ័ន្តខ្មែរ (KSILA) ត្រូវបានចៅក្រមស៊េីបសួរសម្រេចឃុំខ្លួនបណ្ដោះអាសន្នរង់ចាំសវនាការ និងត្រូវបានបញ្ជូនខ្លួនទៅឃុំឃាំងនៅមណ្ឌលអប់រំកែប្រែទី១ ព្រៃស (ម ១) ក្រោមបទចោទ "មិនរាងចាលក្នុងបទមជ្ឈឹមបន្ទាប់ពីការផ្តន្ទាទោសបទមជ្ឈឹម" និងបទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម" យោងតាមមាត្រា ៨៨ ៤៩៤ និង ៤៩៥ នៃក្រមព្រហ្មទណ្ឌ ។ ការចោទប្រកាន់នេះ ត្រូវបានធ្វើឡេីងពាក់ព័ន្ធនឹងករណីជម្លោះដីធ្លីមួយដែលកំពុងកេីតមានឡេីងនៅខេត្តព្រះវិហារ ។
កាលពីថ្ងៃទី០៦ ខែមេសា ប្រហែលម៉ោង ៣ និង ៣០ នាទី រសៀល មន្ត្រីនគរបាលបានបញ្ជាក់ថា លោក សារ៉ាយ ត្រូវបានបញ្ជូនខ្លួនចេញពីស្នងការដ្ឋាននគរបាលរាជធានីភ្នំពេញ ទៅកាន់សាលាដំបូងរាជធានីភ្នំពេញ ។ មុននឹងបញ្ជូនខ្លួន លោកត្រូវបានឃាត់ខ្លួននៅស្នងការដ្ឋានអស់មួយយប់ ចាប់តាំងពីម៉ោង ៤ រសៀល ថ្ងៃទី០៥ ខែមេសា ដោយមន្ត្រីនគរបាលស្លៀកពាក់ស៊ីវិល និងឯកសណ្ឋានប្រហែល ១០ នាក់ នាំខ្លួនលោក ចេញពីការិយាល័យរបស់សមាគមនៅរាជធានីភ្នំពេញ ។ ការចាប់ខ្លួននេះ ត្រូវបានធ្វើឡេីង តាមដីកា ដែលចេញដោយអយ្យការអមសាលាដំបូងរាជធានីភ្នំពេញ បង្គាប់ឱ្យនាំខ្លួនលោក សារ៉ាយ មកសាកសួរនៅស្នងការដ្ឋាន ពាក់ព័ន្ធនឹងការចោទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម" ។
ព្រះសង្ឃមួយអង្គ និងយុវជនប្រមាណជាង ១០ នាក់ មកពីក្រុមផ្សេងៗគ្នា និងតំណាងសង្គមស៊ីវិល បានឈរនៅមុខស្នងការដ្ឋាននគរបាលរាជធានី ដេីម្បីរង់ចាំមេីលស្ថានការណ៍នេះ ។ នៅខណៈនោះដែរ អាជ្ញាធរស្លៀកពាក់ស៊ីវិលពីរបីនាក់ ត្រូវបានដាក់ពង្រាយនៅក្បែរនោះ ដេីម្បីថតរូប និងវីដេអូ នៃអ្នកដែលទៅឈរឃ្លាំមេីលនៅទីនោះ ។ មន្ត្រីនគរបាលដែលយាមច្រកទ្វារចូលស្នងការដ្ឋាន ក៏មិនអនុញ្ញាតឱ្យក្រុមគ្រួសារយកម្ហូបជូនលោក សារ៉ាយផងដែរ ។
ថ្ងៃទី១២ ខែមីនា ឆ្នាំ២០២៤
កាលពីថ្ងៃទី៨ ខែមីនា ឆ្នាំ២០២៤ ប្រជាពលរដ្ឋចំនួន ២៩នាក់ ត្រូវបានសាលាដំបូងខេត្តព្រះវិហារចោទប្រកាន់ ប្រជាពលដ្ឋទាំងនោះត្រូវបានចោទប្រកាន់ពីបទ "កាប់រានព្រៃ ឈូសឆាយដីព្រៃ ហ៊ុំព័ទ្ធកាន់កាប់ដីព្រៃ" យោងតាមមាត្រា ៩៧ កថាខណ្ឌទី ១ ចំណុច ៦ នៃច្បាប់ស្តីពីព្រៃឈើ ។ ៤នាក់ក្នុងចំណោម២៩នាក់ ត្រូវបានដោះលែងឲ្យនៅក្រៅឃុំបណ្តោះអាសន្ន ហើយ២៥នាក់ទៀតត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារខេត្តព្រះវិហារ ។ ក្នុងចំណោមពួកគេទាំងនោះ មាន ១៣នាក់ជាបុរស និង១២នាក់ជាស្រ្តី ។
ពួកគេទាំងនោះត្រូវបានចាប់ខ្លួននៅដើមខែនេះ បន្ទាប់ពីកងកម្លាំងប្រដាប់អាវុធមួយក្រុម រួមជាមួយនឹងមន្ត្រីរដ្ឋបាលព្រៃឈើមួយចំនួន ចូលទៅកាន់ទីតាំងដីដែលមានជម្លោះនោះដោយមានគ្រឿងចក្រសម្រាប់ឈូសឆាយមួយចំនួនចូលមកជាមួយផងដែរ ។ អាជ្ញាធរបានបាញ់គ្រាប់កាំភ្លើងពិត ប្រើប្រាស់គ្រាប់បែកផ្សែង និងចាប់ខ្លួនអ្នកភូមិផងដែរ ។
ការចោទប្រកាន់នេះជាការវិវត្តចុងក្រោយបង្អស់នៅក្នុងជម្លោះដីធ្លីដ៏រ៉ាំរ៉ៃដែលពាក់ព័ន្ធនឹងក្រុមហ៊ុន សីលាដាម៉ិច ខូអិលធីឌី ។ គ្រួសារដែលប៉ះពាល់រស់នៅក្នុងភូមិម្រេច ភូមិស្រយង់ត្បូង និងភូមិក្តាក់ ហើយនិងពលរដ្ឋមួយចំនួនទៀតដែលទើបមកតាំងទីលំនៅនៅក្នុងតំបន់នោះ ។ ក្រុមហ៊ុន សីលាដាម៉ិច ខូអិលធីឌី ទទួលបានដីសម្បទានសេដ្ឋកិច្ចពីរាជរដ្ឋាភិបាល កាលពីខែមីនា ឆ្នាំ២០១១ នៅក្នុងឃុំស្រយង់ និងឃុំភ្នំត្បែងពីរ ស្រុកគូលែន ខេត្តព្រះវិហារ ៕
ថ្ងៃទី៦ ខែមីនា ឆ្នាំ២០២៤
កងកម្លាំងប្រដាប់អាវុធមួយក្រុម ដែលរួមមានកងរាជអាវុធហត្ថ និងមន្ត្រីនគរបាលជាច្រើននាក់ រួមជាមួយនឹងមន្ត្រីរដ្ឋបាលព្រៃឈើមួយចំនួន បានប្រមូលផ្តុំគ្នាកាលពីព្រឹកមិញនេះ ដើម្បីការពារដីធ្លីដែលកំពុងមានជម្លោះនៅក្នុងខេត្តព្រះវិហារ ដោយមានការបាញ់គ្រាប់កាំភ្លើងពិត និងចាប់ខ្លួនពលរដ្ឋមួយចំនួន ។
អ្នកភូមិមួយចំនួន ត្រូវបានគេរាយការណ៍ថា ត្រូវបានអាជ្ញាធរចាប់ និងបញ្ជូនខ្លួនទៅកាន់ក្រុងព្រះវិហារ ។ ទីតាំងជាក់លាក់នៃការឃុំខ្លួន មិនទាន់ដឹងនៅឡើយ ។
អ្នកភូមិមួយចំនួនបានរាយការណ៍ថា កងកម្លាំងប្រដាប់អាវុធចម្រុះដែលប្រដាប់ដោយកាំភ្លើងយន្ត បានចូលទៅក្នុងតំបន់ជម្លោះនោះតាំងពីមុនទៀបភ្លឺ ហើយមានគ្រឿងចក្រសម្រាប់ឈូសឆាយមួយចំនួនចូលមកជាមួយផងដែរ ។ ដោយការភ័យខ្លាចថាទ្រព្យសម្បត្តិរបស់អ្នកភូមិនឹងត្រូវបានបំផ្លាញ ហើយអ្នកទាំងនោះអាចនឹងត្រូវបានកងកម្លាំងទាំងនោះបណ្តេញចេញដោយបង្ខំ អ្នកភូមិទាំងនោះបានប្រមូលផ្តុំគ្នា ទាមទារឱ្យកងកម្លាំង និងអាជ្ញាធរទាំងនោះចាកចេញពីតំបន់នោះ ។ សកម្មភាពប្រឈមមុខដាក់គ្នានេះ ត្រូវបានអ្នកភូមិថតជាវីដេអូបាន ដោយឃើញមានកងកម្លាំងប្រដាប់អាវុធបាញ់គ្រាប់កាំភ្លើងពិតជាច្រើនដង និងមានការប្រើប្រាស់គ្រាប់បែកផ្សែងផងដែរ ។
ថ្ងៃទី២៧ ខែកុម្ភៈ ឆ្នាំ២០២៤
នាព្រឹកនេះ សមាជិកសហគមន៍សំរោងត្បូងមួយចំនួន ត្រូវបានគេរាយការណ៍ថា បានរងរបួសពីការប្រឈមមុខដាក់គ្នារវាងអាជ្ញាធរជាច្រើននាក់ និងសមាជិកសហគមន៍មួយចំនួន នៅពេលដែលអាជ្ញាធរកំពុងចាក់ដីលុបតំបន់មួយក្នុងបឹងតាមោក ក្នុងរាជធានីភ្នំពេញ ។ តំបន់មួយចំនួនក្នុងផ្ទៃបឹងតាមោក ត្រូវបានរាជរដ្ឋាភិបាល កាត់ និងផ្តល់ទៅឱ្យក្រុមហ៊ុន និងបុគ្គលឯកជនមួយចំនួន ដែលមានទំនាក់ទំនងល្អ និងជិតស្និទ្ធជាមួយអាជ្ញាធររដ្ឋ នៅប៉ុន្មានឆ្នាំចុងក្រោយនេះ ។
សមាជិកមួយចំនួននៃសហគមន៍សំរោងត្បូង បានប្រមូលផ្តុំគ្នា កាលពីម្សិលមិញ និងនៅព្រឹកនេះ ដើម្បីតវ៉ាជំទាស់នឹងការឈូសឆាយរបស់អាជ្ញាធររដ្ឋដែលប៉ះពាល់ដល់ដីធ្លីរបស់សមាជិកសហគមន៍ ។ សមាជិកសហគមន៍មួយចំនួន ក៏កំពុងប្រឈមមុខទៅនឹងបណ្តឹងនៅតុលាការផងដែរ ដែលយ៉ាងតិចណាស់មានបណ្តឹងចំនួន ៤ ករណី កំពុងដំណើរការ ចាប់តាំងពីឆ្នាំ ២០២២ ដោយផ្អែកលើភាពសកម្មនិយមលើរឿងដីធ្លីរបស់ពួកគេ ។
ការប្រឈមមុខដាក់គ្នានៅពេលនេះ ដែលពាក់ព័ន្ធនឹងរឿងជម្លោះដីធ្លីដ៏រ៉ាំរ៉ៃនៅតំបន់បឹងតាមោក គឺកើតឡើងនៅពេលដែលគ្រឿងចក្រឈូសឆាយចំនួន ៣គ្រឿង ជាមួយនិងសន្តិសុខចំនួន ១០ នាក់ ត្រូវបានដាក់ពង្រាយ ដើម្បីឈូសឆាយដីដែលកាន់កាប់ដោយសមាជិកសហគមន៍ ។ សមាជិកសហគមន៍មួយចំនួន បានប្រមូលផ្តុំគ្នា និងព្យាយាមបញ្ឈប់ការឈូសឆាយនោះ ។ ក្រោយមកកងកម្លាំងនគរបាលមួយចំនួន បានមកដល់ និងឈរឃ្លាំមើលសកម្មភាពរបស់សហគមន៍ ។ ការឈូសឆាយ បានបន្តនាព្រឹកនេះ ដោយមានវត្តមានកងកម្លាំងនគរបាលច្រើនជាងកាលពីម្សិលមិញ ដោយមានចំនួនប្រហែលជាង ២០០ នាក់ រួមមាននគរបាលប្រមាណជាង ៥០ នាក់ និងលោកអភិបាលរងខណ្ឌព្រែកព្នៅ មួយនាក់ផងដែរ ។ អាជ្ញាធរមួយចំនួន បានឈរមើលការឈូសឆាយ ហើយអាជ្ញាធរមួយចំនួនទៀត ដែលរួមមាននគរបាល និងអាជ្ញាធរស្លៀកពាក់ស៊ីវិល បានថតរូប និងវីដេអូអំពីសកម្មភាពតវ៉ារបស់សមាជិកសហគមន៍ដែលមានចំនួនប្រមាណជាង ១០០ នាក់ កំពុងប្រមូលផ្តុំគ្នានៅតំបន់នោះ ។
ថ្ងៃទី២៧ ខែកុម្ភៈ ឆ្នាំ២០២៤
សាលាឧទ្ធរណ៍ភ្នំពេញនាព្រឹកនេះបានតម្កល់សាលក្រមសាលាដំបូងរាជធានីភ្នំពេញ ដែលបានរកឃើញថា លោក ថាច់ សេដ្ឋា អនុប្រធានគណបក្សភ្លើងទៀន មានពិរុទ្ធ ពីបទចោទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបទញុះញង់ឱ្យមានការរើសអើង" ។ លោក ថាច់ សេដ្ឋា ត្រូវបានសាលាដំបូងផ្តន្ទាទោស ដាក់ពន្ធនាគារចំនួន ៣ ឆ្នាំ និងពិន័យជាប្រាក់ ៤ លានរៀល (ប្រហែល ១.០០០ ដុល្លារអាមេរិក) ។ លោកត្រូវបានផ្តន្ទាទោស ដោយផ្អែកលើព្រឹត្តិការណ៍នៅពេលលោកបានថ្លែងសារទៅកាន់អ្នកគាំទ្រអតីតគណបក្សសង្គ្រោះជាតិ អំឡុងពេលទស្សនកិច្ចនៅប្រទេសកូរ៉េខាងត្បូង កាលពីថ្ងៃទី ៨ ខែមករា ឆ្នាំ២០២៣ ។
លោក សេដ្ឋា ត្រូវបានផ្តន្ទាទោសដោយសាលាដំបូងរាជធានីភ្នំពេញ កាលពីថ្ងៃទី១៨ ខែតុលា ឆ្នាំ ២០២៣ ពីបទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម” និងបទ “ញុះញង់ឱ្យមានការរើសអើង" យោងតាមមាត្រា ៤៩៤ ៤៩៥ និង ៤៩៦ នៃក្រមព្រហ្មទណ្ឌ ។ នេះជាករណីទីពីរហើយ ដែលលោកសេដ្ឋា ត្រូវបានសាលាដំបូងរាជធានីភ្នំពេញផ្តន្ទាទោស ហើយសេចក្តីសម្រេចនេះក៏ត្រូវបានសាលាឧទ្ធរណ៍ភ្នំពេញសម្រេចតម្កល់ទុកជាបានការ ក្នុងរយៈពេលប៉ុន្មានខែចុងក្រោយនេះ ។
កាលពីខែមករា ឆ្នាំ ២០២៤ សាលាឧទ្ធរណ៍ភ្នំពេញបានតម្កល់សេចក្តីសម្រេចរបស់សាលាដំបូង ដែលបានរកឃើញថាលោក សេដ្ឋា មានពិរុទ្ធ លើបទចោទ “មិនបំពេញកាតព្វកិច្ចចំពោះឧបករណ៍ដែលអាចជួញដូរបាន” ហើយបានសម្រេចផ្តន្ទាទោសលោក ដោយដាក់ពន្ធនាគារកំណត់ចំនួន ១៨ ខែ ពិន័យជាប្រាក់ចូលថវិការដ្ឋ និងផ្តល់សំណងទៅដើមបណ្តឹង ។ លោក ថាច់ សេដ្ឋា បានជាប់ពន្ធនាគារអស់រយៈពេល ៤០៧ ថ្ងៃមកហើយ ចាប់តាំងពីមានការចាប់ខ្លួនរបស់លោក កាលពីខែមករា ឆ្នាំ ២០២៣ ពាក់ព័ន្ធនឹងបទចោទមិនបំពេញកាតព្វកិច្ចចំពោះឧបករណ៍ដែលអាចជួញដូរបានខាងលើនេះ ៕
ថ្ងៃទី២៦ ខែកុម្ភៈ ឆ្នាំ២០២៤
តុលាការកំពូលនៅព្រឹកនេះបានសម្រេចឱ្យសកម្មជនដីធ្លីពីររូបមកពីសហគមន៍បឹងកក់ រួចផុតពីបទចោទ ។ សកម្មជនទាំងពីរ មានលោកយាយ ង៉ែត ឃុន អាយុ៨៣ឆ្នាំ (ហៅយាយម៉ាមី) និងអ្នកស្រី ឆេង លាភ អាយុ៥៨ឆ្នាំ ត្រូវបានសាលាដំបូង និងសាលាឧទ្ធរណ៍ផ្តន្ទាទោសពីបទគំរាមកំហែងថានឹងសម្លាប់ក្នុងខែមីនា ឆ្នាំ២០១២ ។
សមាជិកសហគមន៍បឹងកក់នៅរាជធានីភ្នំពេញ បានប្រឈមនឹងជម្លោះដីធ្លីដ៏រាំរ៉ៃ បន្ទាប់ពីរាជរដ្ឋាភិបាលបានជួលបឹងកក់ ទៅឱ្យក្រុមហ៊ុនឯកជនក្នុងឆ្នាំ ២០០៧ ។ សមាជិកសហគមន៍ជាច្រើននាក់ ធ្លាប់ត្រូវបានតុលាការផ្តន្ទាទោសឱ្យជាប់ពន្ធនាគារជាបន្តបន្ទាប់ និងត្រូវបានកាត់ទោសពីបទល្មើសទាក់ទងនឹងការការពារផ្ទះរបស់ពួកគេ និងហ៊ាននិយាយតវ៉ាទៅនឹងការបណ្ដេញចេញដោយបង្ខំ ។
ការចោទប្រកាន់នេះ គឺពាក់ព័ន្ធនឹងហេតុការណ៍ដែលមានក្រដាសសរសេរជាច្រើនសន្លឹក គំរាមថានឹងសម្លាប់អតីតសមាជិកសហគមន៍ម្នាក់ឈ្មោះ លី មុំ ដែលត្រូវបានរកឃើញនៅរាយប៉ាយនៅខាងមុខផ្ទះរបស់នាង។ អ្នកស្រី លី មុំ បានដាក់ពាក្យបណ្ដឹងទៅលើសមាជិកសហគមន៍បឹងកក់ប្រាំមួយនាក់ ដែលក្នុងនោះរួមទាំង លោកយាយ ង៉ែត ឃុន និងអ្នកស្រី ឆេង លាភផងដែរ ។ ស្រ្ដីទាំងប្រាំមួយនាក់នោះបានអះអាងថា ពួកគេមិនទទួលខុសត្រូវចំពោះការគំរាមកំហែងនោះទេ ។
ថ្ងៃទី២២ ខែកុម្ភៈ ឆ្នាំ២០២៤
សាលាឧទ្ធរណ៍ភ្នំពេញព្រឹកនេះ បានតម្កល់សាលក្រមរបស់សាលាដំបូងខេត្តកំពង់ឆ្នាំង ដែលបានផ្តន្ទាទោស លើសមាជិកសហគមន៍ឡពាងបីរូប ពីបទ “ប្រឆាំងនឹងអ្នករាជការសាធារណៈមានស្ថានទម្ងន់ទោស” និង “បទធ្វើឱ្យខូចខាតដោយចេតនា” ក្នុងជម្លោះដីធ្លីដ៏រ៉ាំរ៉ៃមួយ ។ សមាជិកសហគមន៍ទាំងបីរូប រួមមាន លោក ញឹម ញឿន (ដែលត្រូវស្គាល់ថាឈ្មោះ ស្ងួន ញឿន) លោក រាជ សីម៉ា និង លោក ភុល សន ។
សហគមន៍ឡពាង បានតស៊ូជាមួយអស់រយៈពេលជាច្រើនឆ្នាំ ប្រឆាំងនឹងការរំលោភយកដីដោយក្រុមហ៊ុន ខេឌីស៊ី អ៊ិនធើណាស់សិនណាល់ (ជាក្រុមហ៊ុនរបស់លោកស្រី ជា ខេង ដែលជាភរិយារបស់អតីតរដ្ឋមន្ត្រីក្រសួងរ៉ែ និងថាមពល លោក ស៊ុយ សែម) ។
បទចោទភាគច្រើនត្រូវបានចោទប្រកាន់ ដោយចេញពីព្រឹត្តិការណ៍កាលពីឆ្នាំ ២០១៣ នៅពេលដែលក្រុមហ៊ុន ខេឌីស៊ី អ៊ិនធើណាស់សិនណាល់ ចាប់ផ្តើមវាស់វែងកំណត់ព្រំដីជុំវិញដី ដែលមានជម្លោះក្នុងខេត្តកំពង់ឆ្នាំង ។ សមាជិកសហគមន៍ឡពាងជាច្រើននាក់បានមកដល់ទីតាំងដី ដើម្បីធ្វើការតវ៉ា ។ ហើយនៅខណៈពេលកំពុងតវ៉ានោះដែរ រោងចាំដីរបស់កងសន្តិសុខក្រុមហ៊ុន ត្រូវបានបំផ្លាញ ។
ថ្ងៃទី១៦ ខែកុម្ភៈ ឆ្នាំ២០២៤
សាលាឧទ្ធរណ៍ត្បូងឃ្មុំ កាលពីថ្ងៃព្រហស្បតិ៍ បានតម្កល់សេចក្តីសម្រេចរបស់ខ្លួនលើកទីមួយ ដោយផ្តន្ទាទោសដាក់ពន្ធនាគារចំនួន ២ ឆ្នាំ ប៉ុន្តែសម្រេចព្យួរទោសដាក់ពន្ធនាគារ មកលើសមាជិកសហគមន៍ដីធ្លីស្រែប្រាំងចំនួន ៤នាក់ ។ អ្នកទាំង ៤ ត្រូវបានតុលាការចោទប្រកាន់ពីបទ “ធ្វើឱ្យខូចខាតដោយចេតនាមានស្ថានទម្ងន់ទោស ដោយសារការប្រព្រឹត្តមានបុគ្គលច្រើនរូបធ្វើសកម្មភាពក្នុងឋានៈជាសហចារី” ។
សមាជិកសហគមន៍ទាំង ៤ រូប គឺស្ថិតក្នុងចំណោមជនជាប់ចោទចំនួន ៩ នាក់ ដែលត្រូវបានក្រុមហ៊ុនចិន ហាម៊ូនី វីន អ៊ីនវេសមែន ខូ អិលធីឌី ចោទប្រកាន់ថាបានរារាំងគ្រឿងចក្ររបស់ក្រុមហ៊ុន ដោយមិនឱ្យក្រុមហ៊ុនឈូសឆាយដីធ្លីរបស់អ្នកទាំងនោះកាលពីឆ្នាំ ២០១៧ និង ២០២០ ។ អ្នកទាំងនោះ ត្រូវបានផ្តន្ទាទោសពីបទធ្វើឱ្យខូចខាតដោយចេតនាដោយមានស្ថានទម្ងន់ទោស និងដាក់ពន្ធនាគារចំនួន ២ ឆ្នាំ កាលពីឆ្នាំ ២០២១ ដោយសាលាដំបូងខេត្តត្បូងឃ្មុំ ។ ក្រោយមក សាលាឧទ្ធរណ៍ត្បូងឃ្មុំ សម្រេចតម្កល់សាលក្រមសាលាដំបូង កាលពីឆ្នាំ ២០២២ ប៉ុន្តែតុលាការកំពូលកាលពីខែសីហា ឆ្នាំ ២០២៣ បានសម្រេចបញ្ជូនសំណុំរឿងនេះ ទៅឱ្យសាលាឧទ្ធរណ៍ជំនុំជម្រះសាជាថ្មី ។
សាលាឧទ្ធរណ៍ តាមរយៈសវនាការជំនុំជម្រះជាលើកទីពីរ បានសម្រេចតម្កល់ការផ្តន្ទាទោសសមាជិកសហគមន៍ទាំង ៤ នាក់ និងតម្កល់ការដាក់ពន្ធនាគារចំនួន ២ ឆ្នាំ ប៉ុន្តែសម្រេចឱ្យព្យួរទោសទាំងនោះ ។ សមាជិកសហគមន៍ទាំងនោះ រួមមាន លោក ចក់ ជ័យ អ្នកស្រី ឃឹម សុខជាង លោក ពុំ ពេជ្រ និងលោក វឿន វឿ ។
.jpg)
ថ្ងៃទី១៥ ខែកុម្ភៈ ឆ្នាំ២០២៤
សាលាឧទ្ធរណ៍បាត់ដំបងថ្ងៃនេះ បានតម្កល់សាលក្រមសាលាដំបូងខេត្តបន្ទាយមានជ័យ ដោយផ្តន្ទាទោសដាក់ពន្ធនាគាររយៈពេល ៣ ឆ្នាំ លើ លោក កង សារ៉ន ដែលជាសកម្មជនសង្គម ហើយត្រូវបានអាជ្ញាធរចាប់ខ្លួន កាលពីខែ កក្កដា ឆ្នាំ ២០២៣ ជុំវិញការបញ្ចេញមតិរបស់លោកទៅលើបញ្ហានយោបាយតាមរយៈការផ្សាយផ្ទាល់លើបណ្តាញសង្គម ហ្វេសប៊ុក របស់លោក ។
លោក សារ៉ន ត្រូវបានចាប់ខ្លួនដំបូងកាលពីថ្ងៃទី២ ខែកក្កដា ឆ្នាំ២០២៣ ពេលដែលលោកបានបញ្ចេញមតិនៅក្នុងវីដេអូមួយ ដែលបង្ហោះតាមគណនីហ្វេសប៊ុករបស់លោក នៅអំឡុងពេលនៃការឃោសនាបោះឆ្នោតថ្នាក់ជាតិ ។ ក្រោយមក លោក សារ៉ន ក៏ត្រូវបានលែងវិញបន្ទាប់ពីលោកបានធ្វើការសុំទោស ។ ទោះបីជាយ៉ាងណាក៏ដោយ លោកត្រូវបានកាត់ទោស ដោយសាលាដំបូងខេត្តបន្ទាយមានជ័យ កាលពីថ្ងៃទី ២២ ខែវិច្ឆិកា ពីបទ “ញុះញង់ឱ្យប្រព្រឹត្តបទឧក្រិដ្ឋជាអាទិ៍” “ជេរប្រមាថជាសាធារណៈ” និងបទ “ប្រមាថចំពោះអង្គព្រះមហាក្សត្រ” ហើយត្រូវបានផ្តន្ទាទោសដាក់ពន្ធនាគាររយៈពេល ៣ ឆ្នាំ ។ លោក សារ៉ន ត្រូវបានចាប់ខ្លួនកាលពី ថ្ងៃទី២៥ ខែវិច្ឆិកា និងឃុំខ្លួននៅក្នុងពន្ធនាគារខេត្តបន្ទាយមានជ័យ ។
សាលាឧទ្ធរណ៍បាត់ដំបង បានសម្រេចតម្កល់ការផ្តន្ទាទោសខាងលើនេះ កាលពីថ្ងៃព្រហស្បតិ៍ ។ ដូចនេះលោកនឹងនៅបន្តក្នុងពន្ធនាគារ រង់ចាំការប្តឹងសាទុក្ខទៅតុលាការកំពូល ។
ថ្ងៃទី៧ ខែកុម្ភៈ ឆ្នាំ២០២៤
ថ្ងៃទី ៧ ខែកុម្ភៈ ឆ្នាំ២០២៤ សាលាដំបូងខេត្តចំនួនពីរ បានសម្រេចផ្តន្ទាទោសសកម្មជនដ៏លេចធ្លោចំនួន ពីររូប នៅក្នុងសំណុំរឿងចំនួន ពីរ ដាច់ដោយឡែកពីគ្នា ។
សកម្មជនបរិស្ថាន លោក ឆន ផល្លា ត្រូវបានផ្តន្ទាទោសដាក់ពន្ធនាគារចំនួន ១ឆ្នាំ
សាលាដំបូងខេត្តរតនគិរី នាព្រឹកថ្ងៃនេះ បានប្រកាសសាលក្រម ដោយសម្រេចផ្តន្ទាទោសលោក ឆន ផល្លា ពីបទបរិហាកេរ្តិ៍ជាសាធារណៈ ប្រមាថ និងបទ ញុះញង់ឲ្យប្រព្រឹត្តបទឧក្រិដ្ឋជាអាទិ៍ ដោយយោងតាមមាត្រា ៣០៥ ៥០២ និង ៤៩៥ នៃក្រមព្រហ្មទណ្ឌ ។ តុលាការបានផ្តន្ទាទោសលោក ដោយដាក់ពន្ធនាគារកំណត់ចំនួន ១ ឆ្នាំ និងពិន័យជាប្រាក់ចំនួន ១០ លានរៀល (ប្រមាណ ២.៥០០ ដុល្លារអាមេរិក) ។
អត្ថបទខ្លីៗ | សកម្មជនគណបក្សជំទាស់ពីររូបទៀតត្រូវបានចាប់ខ្លួន នៅមុនការបោះឆ្នោតព្រឹទ្ធសភា
ថ្ងៃទី១ ខែកុម្ភៈ ឆ្នាំ២០២៤
ការបង្រ្កាបទៅលើសមាជិកគណបក្សជំទាស់ គឺកាន់តែកើនឡើង ដោយកាលពីម្សិលមិញ សមាជិកគណបក្សជំទាស់ពីររូបបន្ថែមទៀតត្រូវបានចាប់ខ្លួន ។ អាជ្ញាធរបន្តចាប់ និងឃុំខ្លួនអ្នកដែលមាននិន្នាការនយោបាយជំទាស់ មុនឈានដល់ការបោះឆ្នោតព្រឹទ្ធសភាខាងមុខនេះ ។
លោក ម៉ា ចិន្តា ប្រធានក្រុមចលនាយុវជនគណបក្សភ្លើងទៀនប្រចាំខណ្ឌដូនពេញ រាជធានីភ្នំពេញ ត្រូវបានអាជ្ញាធរចាប់ខ្លួនកាលពីថ្ងៃទី ៣១ ខែមករា ឆ្នាំ២០២៤ ក្នុងអំឡុងពេលមានការប្រជុំគណបក្សភ្លើងទៀននៅក្នុងរាជធានីភ្នំពេញ ។ នៅថ្ងៃដដែល លោក ហាក់ កុសល ដែលជាសកម្មជនគណបក្សជំទាស់មួយរូបទៀតក៏ត្រូវបានអាជ្ញាធរចាប់ខ្លួនផងដែរ ។ ការចាប់ខ្លួនលោក កុសល ត្រូវបានធ្វើឡើងមួយថ្ងៃ ក្រោយពេលដែលលោកបានទៅដាក់បញ្ជីឈ្មោះអ្នកសង្កេតការណ៍សម្រាប់ការបោះឆ្នោតព្រឹទ្ធសភា តំណាងឱ្យគណបក្សឆន្ទៈខ្មែរ នៅគណៈកម្មាការរាជធានីខេត្ត រៀបចំការបោះឆ្នោត ។
អ្នកទាំងពីរត្រូវបានចោទពីបទ “ក្លែងបន្លំ” និង “ប្រើប្រាស់លិខិតក្លែង” ដែលប្រឈមនឹងជាប់ពន្ធនាគារពី ១ឆ្នាំ ទៅ ៣ឆ្នាំ ប្រសិនបើរកឃើញថាមានទោស ។
ថ្ងៃទី៣០ ខែមករា ឆ្នាំ២០២៤
នាព្រឹកនេះ សាលាឧទ្ធរណ៍រាជធានីភ្នំពេញ បានបើកសវនាការលើកដំបូងទាក់ទងនឹងការផ្តន្ទាទោសលើឯកឧត្តម កឹម សុខា ពីបទក្បត់ជាតិ និងបទសន្ទិដ្ឋិភាពជាមួយបរទេស ។ ឯកឧត្តម គឺជាអតីតប្រធានគណបក្សសង្គ្រោះជាតិ (CNRP) ដែលត្រូវបានរំលាយ ។ ឯកឧត្តមត្រូវបានផ្តន្ទាទោសឲ្យជាប់ពន្ធនាគារ ២៧ ឆ្នាំ ដោយសាលាដំបូងរាជធានីភ្នំពេញកាលពី ខែមីនា ឆ្នាំ២០២៣ ។ ការផ្តន្ទាទោសនេះ ធ្វើឡើងក្នុងរយៈពេលមិនដល់ ៥ខែ នោះទេ មុនពេលបោះឆ្នោតជាតិ កាលពីខែកក្កដា ឆ្នាំមុននេះ ។ ឯកឧត្តម កឹម សុខា ត្រូវបានបញ្ជូនទៅឃុំខ្លួនក្នុងផ្ទះ រហូតដល់សាលដីកាចូលជាស្ថាពរ ។
អំឡុងពេលសវនាការ មេធាវីរបស់ឯកឧត្តមបានស្នើសុំតុលាការឱ្យកែសម្រួលលក្ខខណ្ឌតឹងរឹងមួយចំនួនអំឡុងពេលឃុំខ្លួនក្នុងផ្ទះ ប៉ុន្តែចៅក្រមបានបដិសេធ និងបន្តឱ្យឯកឧត្តមស្ថិតនៅក្រោមលក្ខខណ្ឌនៃការត្រួតពិនិត្យតាមផ្លូវតុលាការដដែល ។
មុនពេលចាប់ផ្តើមសវនាការ អាជា្ញធរបានធ្វើការបិទផ្លូវជុំវិញសាលាឧទ្ធរណ៍ ដោយហាមឃាត់មិនឱ្យសាធារណជន ក៏ដូចជាអ្នកសារព័ត៌មានអាចចូលទៅខាងមុខអាគារតុលាការបាននោះទេ ។
ថ្ងៃទី២២ ខែមករា ឆ្នាំ២០២៤
សាលាឧទ្ធរណ៍រាជធានីភ្នំពេញ រសៀលនេះបានសម្រេចតម្កល់សាលក្រម ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន ទៅលើ អនុប្រធាន គណបក្សភ្លើងទៀន លោក ថាច់ សេដ្ឋា ។ លោក សេដ្ឋា ត្រូវបានតុលាការបង្គាប់ឱ្យកងកម្លាំងបញ្ជូនខ្លួនទៅកាន់ពន្ធនាគារភ្លាមៗ ក្រោយពេលប្រកាសសាលដីកា ។
សាលាដំបូងរាជធានីភ្នំពេញ បានកាត់ទោសលោក សេដ្ឋា នៅថ្ងៃទី២១ ខែកញ្ញា ឆ្នាំ២០២៣ ពីបទមិនបំពេញកាតព្វកិច្ចចំពោះឧបករណ៍ដែលអាចជួញដូរបាន យោងតាមមាត្រា២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់ ។ គាត់ត្រូវបានតុលាការកាត់ឱ្យជាប់ពន្ធនាគារ ១៨ ខែ និងបង្គាប់ឱ្យសងជាប្រាក់ពិន័យ ៣ លានរៀល (ប្រមាណជា ៧៥០ដុល្លារ) និងសងប្រាក់ទៅកាន់ដើមបណ្តឹង ដែលជាហាងបញ្ចាំ រិនឆាយ ចំនួន ៣៣.៤០០ ដុល្លារ (ប្រមាណជា ១៣៣,៦ លានរៀល) និង សំណងជំងឺចិត្ត ៥ លានរៀល (ប្រមាណ ១.២៥០ដុល្លារ) ផងដែរ ។ សាលក្រមនេះ ត្រូវបានសាលាឧទ្ធរណ៍សម្រេចតម្កល់ទុកជាបានការ ។
បទចោទនេះ ត្រូវបានធ្វើឡើងតាមបណ្តឹងមួយ ដែលបានចោទលោក សេដ្ឋា ថាបានចេញ មូលប្បទានប័ត្រចំនួន ៥ សន្លឹកដែលគ្មានទឹកប្រាក់ (សែកស្អុយ) កាលពីឆ្នាំ ២០១៩ ដើម្បីសងប្រាក់ទៅកាន់ហាងបញ្ចាំ រិន ឆាយ ។ បញ្ហាបំណុលនេះ លោកបានលើកឡើងថា ជាករណីបណ្តឹងរដ្ឋប្បវេណីដែលមានពីមុន ហើយត្រូវបានដោះស្រាយ ដោយសាលាឧទ្ធរណ៍កាត់ក្តីឱ្យលោក សេដ្ឋា ឈ្នះក្តី ។
ថ្ងៃទី១៦ ខែមករា ឆ្នាំ២០២៤
ប្រធានស្តីទីគណៈកម្មាធិការប្រតិបត្តិនៃគណបក្សភ្លើងទៀនរាជធានីភ្នំពេញត្រូវបានឃាត់ខ្លួន កាលពីថ្ងៃ ច័ន្ទ និងបានបញ្ជូនខ្លួនទៅកាន់តុលាការ នៅថ្ងៃនេះ បន្ទាប់ពីរងការចោទប្រកាន់ដោយសាលាដំបូងរាជធានីភ្នំពេញ ពីបទ ក្លែងបន្លំឯកសារពាក់ព័ន្ធនឹងការបោះឆ្នោត ។
កាលពីថ្ងៃច័ន្ទ លោក ខឹម ចាន់វណ្ណៈ ត្រូវបានឃាត់ខ្លួនពេញមួយយប់ដោយនគរបាល ខណៈពេលដែលលោកកំពុងស្ថិតនៅក្នុងគេហដ្ឋានជាមួយក្រុមគ្រួសាររបស់លោក។ នៅថ្ងៃ អង្គារ៍ ស្នងការដ្ឋាននគរបាលរាជធានីភ្នំពេញបាន ចេញសេចក្តីថ្លែងការណ៍មួយ ដោយបានលើកឡើងថា លោក ខឹម ចាន់វណ្ណៈ ត្រូវបានឃាត់ខ្លួន ដើម្បីឆ្លើយបំភ្លឺទាក់ទិននឹង ការក្លែងបន្លំឯកសារពាក់ព័ន្ធនឹងការបោះឆ្នោតកាលពីថ្ងៃទី ៧ ខែវិច្ឆិកា ឆ្នាំ២០២៣ កន្លងទៅ។
អត្ថបទខ្លីៗ | ពលរដ្ឋនៅខេត្តសៀមរាបតវ៉ាជំទាស់ជាមួយនឹងការរឹតត្បិតរបស់អាជ្ញាធរអប្សរា
ថ្ងៃទី១៥ ខែមករា ឆ្នាំ២០២៤
នាព្រឹកនេះប្រជាពលរដ្ឋរស់នៅខេត្តសៀមរាបជាច្រើនរយនាក់ ធ្វើការដើរតវ៉ាឆ្ពោះទៅកាន់សាលាខេត្ត ដើម្បីដាក់ញត្តិទាមទារឱ្យមានការអន្តរាគមន៍ពីសំណាក់រាជរដ្ឋាភិបាល និង អង្គការយូណេស្កូ ក្នុងគោលបំណងបញ្ឈប់ការរឹតត្បិតដោយបង្ខំរបស់អាជ្ញាធរអប្សរា ក្នុងការសាងសង់សំណង់ និងរៀបចំជួសជុលផ្សេងៗ ។ អាជ្ញាធរអប្សរា គឺជាភ្ញាក់ងាររបស់រាជរដ្ឋាភិបាល ដែលមានតួនាទីគ្រប់គ្រងឧទ្យានអង្គរ ។
ប្រជាពលរដ្ឋប្រមាណជាង៥០០នាក់ ដែលមកពីឃុំខ្នាត ស្រុកពួក និង សង្កាត់ទឹកវិល ក្រុងសៀមរាប បានធ្វើការដង្ហែក្បួនដោយមានកាន់បដា ឆ្ពោះទៅទីតាំងមុខសាលាខេត្តសៀមរាប ដើម្បីដាក់ញតិ្តស្នើសុំឱ្យ សម្តេចនាយករដ្ឋមន្ត្រី ហ៊ុន ម៉ាណែត សម្តេច ហ៊ុន សែន និងអង្គការយូណេស្កូ អន្តរាគមន៍ ដោយបញ្ឈប់អាជ្ញាធរអប្សរា កុំឱ្យបង្កការភ័យខ្លាចនិងទប់ស្កាត់រាល់ការសាងសង់ ឬជួសជុលរបស់ប្រជាពលរដ្ឋនៅក្នុងឃុំខ្នាត ។ នៅក្នុងញត្តិនោះ ពលរដ្ឋបានលើកឡើងថា តំបន់ដែលពលរដ្ឋស្នើសុំនោះ គឺនៅឆ្ងាយពីតំបន់ប្រាសាទរបស់ឧទ្យានអង្គរ ។
នៅពេលហែក្បួនតវ៉ា ប្រជាពលរដ្ឋជាច្រើននាក់ ត្រូវបានឃាត់មួយរយៈ ដោយកងកម្លាំងនគរបាលប្រមាណជា២០នាក់ ដឹកនាំដោយអភិបាលស្រុកពួក លោក ស៊ិន ចាន់ថុល ដោយលោកអភិបាលស្រុកចង់ឱ្យប្រជាពលរដ្ឋតែ ៤ទៅ៥នាក់ប៉ុណ្ណោះ ដើម្បីយកញាត្តិទៅដាក់ ប៉ុន្តែប្រជាពលរដ្ឋបានបដិសេធ ហើយពួកគេនៅតែបន្តការដង្ហែក្បួនឆ្ពោះទៅកាន់សាលាខេត្តដដែល ដោយធ្វើដំណើររហូតដល់ផ្លូវចូលមុខសាលាខេត្តដោយមានកាន់បដាផងដែរ ។ បដាមួយក្នុងចំណោមបដាជាច្រើន ដែលកាន់ដោយសមាជិកសហគមន៍បានសរសេរថា៖ “ពួកយើងមិនអនុញ្ញាតិឲ្យអាជ្ញាធរអប្សរាបន្តការគាបសង្កត់មកលើសហគមន៍របស់យើងទៀតទេ”។
